Karini transgenderə uduzdu və boksdan getdi
Parisdə keçirilən 33-cü Yay Olimpiya Oyunları öz axarıyla davam edir. Azərbaycan idmançılarının medalları öz yerində, Fransanın paytaxtında başqa maraqlı hadisələr də baş verir.
Məsələn, belçikalı triatlonçu Jolyen Vermeylen bildirib ki, Senada üzərkən suda zibil görüb:
“Körpünün altında üzərkən elə şeylər gördüm ki, bunlar haqda düşünməmək yaxşıdı. Sena artıq 100 ildi çirklidi. İdmançıların təhlükəsizliyi prioritet olmalıdı. Dünya səviyyəli idmançılar belə suda yarışmamalıdı”.
Olimpiadada triatlon yarışları iyulun 31-də start götürüb. Bundan əvvəl isə Senanın suyunun keyfiyyəti üzündən məşqlərin və kişilərin yarışının vaxtı dəyişib. Yarışların ilk günündə iki idmançının ürəyi bulanıb. Kanadalı Tayler Mislavçuk və Qazaxıstan təmsilçisi Yekaterina Şabalina finişə çatandan sonra özünü pis hiss edib. İsveçli xanım triatlonçu Tilda Monsson isə suyun rəngindən və iyrənc qoxusundan narazılıq edib.
Dopinq-testin ləngiməsi ilə bağlı narazılıqlar da var. 100 kq-a qədər çəki dərəcəsində yarışan iki cüdoçu dopinq-test zamanı kompütürin işləməməsi üzündən üç saat ləngiyib. Bürünc medal qazanan israilli Peter Palçik belə deyib:
“Dopinq-testdən keçməyim üç saat çəkdi. Kompüter işləmirdi, proqram açılmırdı”.
Oyunların indiyəqədərki ən böyük qalmaqalı da yaşanıb. İtaliyalı boksçu Ancela Karini əlcəzairli İman Xəliflə döyüşün 46-cı saniyəsində mübarizəni dayandırıb. O, rəqibin əlini də sıxmayıb, rinqin ortasında oturaraq ağlayıb. Xatırladaq ki, İman Xəlif cinsini dəyişmiş idmançıdı, ötən il gender testindən keçə bilmədiyinə görə dünya çempionatından kənarlaşdırılmışdı. Beynəlxalq Olimpiya Komitəsi (BOK) bu qalmaqala görə Beynəlxalq Boks Assosiasiyasını (IBA) günahlandırıb. IBA da öz növbəsində BOK-u bu idmançını yarışa buraxdığına görə tənqid edib.
25 yaşlı Karini 2019-cu ildə keçirilən Avropa və dünya çempionatlarının gümüş medalçısıdı. Transgender idmançıya uduzmaq ona çox pis təsir edib. Karini burnundan çox sərt zərbə alıb və bir qadın idmançının belə güclü zərbə vurmasının mümkün olmadığını deyib. Dediyinə görə, ağrıya dözə bilmədiyinə görə təslim olub. Maraqlıdı ki, italiyalı boksçu artıq karyerasını bitirdiyini elan edib:
“Özüm-özümdən soruşdum: qarşımdakı kimdi? Ancaq bu, mənim həll edəcəyim məsələ deyil. Rəqibə də yazığım gəlir, media ətrafımızda elə ajiotaj yaratdı ki... Biz kimik ki, kimisə mühakimə edək, nəyin doğru, nəyin yanlış olduğunu deyək? Biz idmançıyıq, hakim deyilik. Bunu mən məğlubiyyət saymıram. Uduzmadım, bilərəkdən təslim oldum. Rinqdən başıuca ayrılıram və boksla vidalaşıram”.
Bir neçə kəlmə də medal sıralamasındakı durumla bağlı danışaq. Ənənəvi favoritlərdən Çin 1-ci, ABŞ 4-cü pillədə qərarlaşıb. “Doğma divarlar”ın da dəstəyindən yararlanan fransalı idmançıların ikinciliyi daimi də ola bilər, keçici də. Avstraliya və Böyük Britaniya da liderlər qrupunadı.
Azərbaycanın postsovet məkanı ölkələrinin hamısından irəlidə olması da sevindirici məqamdı. Güləşçilərimizin hələ mübarizəyə qoşulmadığını da unutmayaq. Artıq iki qızıl medalımız var. Bu isə Sidney (2000) və London (2012) Olimpiadalarındakı nəticənin təkrarlanmasıdı. Xatırladaq ki, sonuncu – Tokio Olimpiadasında idmançılarımız yalnız 3 gümüş və 4 bürünc medal qazana bilmişdi.
Digər xəbərlər
