Nazir Senada üzdü və ölkəsini təriflədi - “Möhtəşəmdi, sözümüzü tutduq!”
Fransanın idman naziri Ameli Udea-Kastera Paris Olimpiadasının startı ərəfəsində Sena gölündə üzüb:
“Demişdik ki, Olimpiadaya hazır olacağıq və hazırıq. Möhtəşəmdi, sözümüzü tutduq! Çox duyğulandım. Dövlət xidmətlərinin və müvafiq icmaların son dörd ildə gördüyü işin nəticəsini bu gün göstərdiyimə görə məmnunam”.
Xatırladaq ki, suyun keyfiyyəti ilə bağlı şübhələr olduğuna görə ötən ilin avqustunda Senadakı test xarakterli üzmələr ləğv olunmuşdu. 1923-cü ildən bəri Senada üzmək qadağan idi. Onilliklər ərzində gölə zibil, zəhərli qarışıqlar və kanalizasiya axıdılıb.
İyulun 26-da start götürəcək Paris Olimpiadası ilə bağlı başqa maraqlı xəbərlər də var. Başı noyabrda keçiriləcək prezidentlik yarışına qarışan ABŞ-nin dövlət başçısı Co Bayden Olimpiya Oyunlarına getməyəcək. Ağ Evin rəsmi saytında yer alan xəbərə görə, Oyunların açılış mərasimində ABŞ nümayəndə heyətinə birinci ledi Cil Bayden rəhbərlik edəcək, bağlanış mərasimində isə vitse-prezident Kamala Harrisin həyat yoldaşı Duqlas Emhoff iştirak edəcək.
Fransızların indidən öyünmək üçün daha bir əsası var. Olimpiadanın təşkilat komitəsinin rəhbəri Toni Estanqe yarışların bütün tarixi boyunca rekord sayda bilet satılmasıyla bağlı hesabat verib. Olimpiadanın startına iki həftə qalmış artıq 8,6 milyon bilet satılıb. Əvvəlki rekord (8,3 milyon bilet) 1996-cı ildə keçirilən Atlanta Olimpiadasında müəyyənləşdirilmişdi. Estanqe yeni rekordla bağlı sevincini gizlətməyib:
“Artıq rekordu qırdığımıza görə qürur duyuruq, ancaq bir qədər də yuxarı qalxa bilərik”.
