Paris meri Senada çimməyi təxirə saldı - Olimpiada ətrafında nələr yaşanır?
İyulun 26-dan avqustun 11-nə qədər Parisdə dördilliyin ən mötəbər idman yarışı – Olimpiada keçiriləcək.
“Football-plus.az” xəbər verir ki, bu üzdən qarşıdakı yarışla bağlı xəbərlərin çoxluğu adi haldı.
Paris polisi Olimpiada vaxtı terror aktları hazırlamaqda şübhəli bilinən gənc oğlanı saxlayıb. Bu haqda xəbəri “Le Parisien” yayıb. 19 yaşlı həmin şəxsin Olimpiada günlərində milli əlamətlər əsasında zorakılıq aktları həyata keçirməyi planlaşdıran cinayətkar qruplaşmanın başçısı olduğu bəllidi. İyunun 21-də ona şəxsiyyətlər əleyhinə yönəlmiş cinayətkar hərəkətlərin hazırlanması, həmçinin silah əldə etmək və saxlamaq bəndləri ilə ittiham irəli sürülüb.
“Le Journal du Dimanche” isə Olimpiada günlərində təhlükəsizliyin təmin olunması üçün ABŞ, Böyük Britaniya və Avropa İttifaqından hərbçilərin cəlb olunacağı ilə bağlı xəbər yayıb. Həmin qaynağın iddiasına görə, bu prosesə Belçika, Polşa, Almaniya, Danimarka, İspaniya, Litva və Niderlanddan olan hərbçilər də cəlb olunacaq. Olimpiada vaxtı Fransa ərazisində müxtəlif ölkələrdən iki minə yaxın polis və əsgərin olacağı gözlənilir.
Bu arada Paris regionunun prefekti Mark Giyom bildirib ki, Senadan götürülən nümunələr zəruri standartlara uğyun deyil. Çay Olimpiada yarışlarının keçirilməsi baxımından hədsiz çirklidi. Xatırladaq ki, Yay Olimpiya Oyunlarının üçnövçülük və açıq havada üzgüçülük yarışları burda keçirilməlidi. “Frans Press” agentliyi Giyomun bu fikirlərinə yer verib:
“Senadan götürülən nümunələr standartlara uyğun deyil. Yağışlar, güclü axın, günəş işığının çatışmaması və havanın hərarətinin mövsümlük normadan aşağı olması üzündən suyun keyfiyyəti pisləşməkdə davam edir”.
Apreldə ətraf mühitin mühafizəsi üzrə ixtisaslaşan “Surfrider Foundation” qeyri-kommersiya təşkilatı Senada patogen bakteriyaların konsentrasiyasının çox yüksək olmasıyla bağlı xəbərdarlıq etmişdi. İyunun 1-də isə məlum olub ki, nasos stansiyasında sistemlərin sıradan çıxması nəticəsində çaya 50 milyon litrə yaxın çirkab su qarışıb. Paris meri Ann İdalqo da iyunun 23-nə planlaşdırılan Senada çimməyi təxirə salıb.
Rusiya mediasının yaydığı və etibarlı olduğuna tam təminat verə bilmədiyimiz başqa bir xəbər də var. Qonşu ölkənin mediası iddia edir ki, Özbəkistanın müxtəlif idman növləri üzrə yığmaları iyunun 12-24-ü aralığında Moskvada və Kazanda keçirilən BRİKS Oyunlarında iştiraka görə Beynəlxalq Olimpiya Komitəsinin (BOK) təzyiqinə məruz qalıb. Guya bəzi idman növləri üzrə milli federasiyalara BOK-dan gələn məktublarda BRİKS Oyunlarına qatılacaqları təqdirdə sanksiyalarla üzləşə biləcəkləri ilə bağlı təhdidlər yer alıb. İdmançılar BRİKS Oyunlarını və ya Olimpiadanı seçmək qarşısında qalıb ki, belədə Özbəkistan Kazana güləş yığmasının optimal heyətini göndərməyib. Belə məktubların Özbəkistanla yanaşı, başqa ölkələrə göndərildiyi də iddia olunur.
Xatırladaq ki, BRİKS Oyunlarında 54 ölkədən olan idmançılar 27 idman növü üzrə yarışıb.
Digər xəbərlər
