Misli premyer-liqasının ilk turunda “Neftçi” doğma meydanda “Turan Tovuz”la qolsuz heç-heçəyə razılaşdı - 0:0. Roman Qriqorçukun rəhbərliyi altında ilk rəsmi matça çıxan “ağ-qaralar” azarkeşlərini sevindirə bilmədi.

Oyundan sonra “Neftçi”nin yarımmüdafiəçisi Kilan Lebon “Football-plus.az”ın suallarını cavablayıb.

- Mövsümə heç-heçə ilə başladız. Nəticə səni qane etdi?
- Çətin oyun idi. Rəqib çox yaxşı müdafiə olunurdu. Çıxış yolu tapmağa çalışırdıq. Bu dəfə uğursuz alındı, növbəti oyunlarda uğurlu olar. Yeni baş məşqçi, yeni sistem var. Buna uyğunlaşmalıyıq. Məşqçinin hər oyunçudan fərqli-fərqli tələbləri var.

- Özünü formada və çempionata tam hazır hiss edirsənmi?
- Bildiyiniz kimi, komandanın təlim-toplanışına gec qoşuldum. Bir neçə həftə geri düşdüm. Buna baxmayaraq, istədiyim formanı yığmağa başlayıram. Və qarşıdaki oyunlarda özümü daha yaxşı tərəfdən göstərməyə çalışacam.

- Bugünkü oyunundan razı qaldın?
- Xeyr, razı qalmadım...

- Azarkeşlər sizdən çempionluq gözləyir. Bəs sən buna nə qədər inanırsan?
- "Neftçi" üçün hədəf həmişə çempionluqdu. Addım-addım buna doğru getməliyik. Nə dərəcədə yaxşı alınacaq, bunu zaman göstərəcək.

RÖYANƏ OĞUZ