“Bayer-04” yeni hücumçu alıb. Almaniyanın son çempionunu bu ampluada çıxış edən bir oyunçu tərk edib.

“Football-plus.az” xəbər verir ki, Leverkuzen klubu “Renn”in hücumçusu Marten Terryeni sıralarına qatıb. Fransız futbolçu ilə 5 illik müqavilə imzalanıb. Terrye yeni klubunda “11” nömrəli formanı geyəcək. Qeyd edək ki, 27 yaşlı forvard karyerası ərzində ilk dəfə legioner həyatı yaşayacaq. O, buna qədər vətənində “Lill”, “Strasbur”, “Lion” və “Renn”də forma geyib. Marten son mövsüm Fransa çempionatında meydana çıxdığı 24 matçda 7 qol vurub və 3 məhsuldar ötürmə verib.

Sərdar Azmun isə Almaniyanı tərk edib. “Bayer-04”ün iranlı hücumçusu karyerasını Birləşmiş Ərəb Əmirliklərində (BƏƏ) davam etdirəcək. Məşhur insayder Fabritsio Romanonun məlumatına görə, Azmun artıq “Şəbab Əl-Əhli” ilə razılığa gəlib. Tibbi müayinədən problemsiz keçəcəyi halda futbolçu ilə müqavilə imzalanacaq. Son xəbərdə transferin BƏƏ klubuna 5 milyon avroya başa gələcəyi bildirilib. “Bayer-04”ə 2022-ci ildə “Zenit”dən keçən 29 yaşlı Sərdar ötən mövsüm icarə əsasında “Roma”da çıxış edib.