Türkiyənin Ərzurum bölgəsində təlim-məşq toplanışını davm etdirən “Neftçi” çərşənbə günü ikinci yoxlama matçını keçirdi.

"Football-plus.az" xəbər verir ki, Roman Qriqorçukun rəhbərliyin altındakı “ağ-qaralar” ilk sınaq matçında “Alanyaspor” üzərində qələbə qazandığı kimi, bu dəfə də “Sivasspor”dan üstün olmağı bacardı. Paytaxt təmsilçisi superliqa klubunu 2:1 hesabıyla məğlub etdi.

Qriqorçukun meydana buraxdığı start heyəti: 93. Rza Cəfərov (q), 17. Rəhman Hacıyev, 3. Höccət Haqverdi, 99. Ervin Koffi, 14. Edvin Kuç, 8. Emin Mahmudov, 10. Filip Ozobiç, 90. Ramil Şeydayev, 9. Andre Şinyaşiki, 4. Mark Tamaş, 44. Yuri Matias.

Oyun “Neftçi”nin fəallığıyla start götürüb. “Ağ-qaralar” 27-ci dəqiqədə hesabı açıb. Mahmudovun künc zərbəsindən qapı önünə göndərdiyi ötürmə zamanı macarıstanlı müdafiəçisi Tamaş topu tora qovuşdurub. Qoldan sonra uzun müddət səssizlik hökm sürüb. Bu sükut yalnız 74-cü dəqiqəsində pozulub. Aleks “yiğidolar”ın bərabərlik qolunu vurmağı bacarıb. Lakin superliqa təmsilçisinin sevinci çox çəkməyib. Qriqorçukun 2-ci hissədə meydana buraxdığı Boqomolski qələbə qolunu vura bilib.

Türkiyədə keçirdiyi ikinci sınaq matçından da qələbə ilə ayrılan “ağ-qaralar” bu gün saat 18.00-da 1-ci liqa təmsilçisi “Ərzurumspor”la qarşılaşacaq.

KAMAL SƏFƏR