Sabah “Zirə” Konfrans Liqasının 2-ci təsnifat mərhələsi çərçivəsində Slovakiyanın “DAK 1904” komandasıyla evdə qarşılaşacaq.

“Football-plus.az” xəbər veri ki, “qartallar”ın baş məşqçisi oyundan əvvəl baş tutan mətbuat konfransında rəqib haqda fikirlərini bölüşərək, jurnalistlərin suallarını cavablandırıb:

- Slovakiya komandalarıyla az qarşılaşmışıq. Bu rəqib barədə nə düşünürsüz?

- “DAK 1904”ün baş məşqçisi ispaniyalı mütəxəssisdi və 5-3-2 sxemiylə oynayırlar. Rəqib haqda çox danışmaq istəmirəm. Amma yaxşı futbolçuları var və ən önəmlisi də komanda şəklində çıxış etmələridi. Həmçinin meydanın mərkəzində yaxşı pressinq tətbiq edə bilirlər. Yaxşı komandaya qarşı mübarizə aparacayıq. Detallı şəkildə danışmaq istəmirəm. “Şerif”ə nisbətən bu oyuna hazıtlaşmaq üçün vaxtımız daha az olub. Ancaq oyunçularımın kifayət qədər istirahət etdiyini düşünürəm.

- Salifu Suma “Zirə”dəki karyerasına necə kölgə saldı?
- Suma “Zirə”dəki yox öz karyerasına kölgə saldı. Çünki oyuna da yaxşı başlamışdı. Əgər mərhələni keçsəydik ona təkliflər ola bilərdi. Belə məqamlarda ən sakit futbolçunun, anidən bu tərzdə hərəkət etməsi bizim üçün gözlənilməz oldu. Onun bu hərəkəti bizi məyus etdi. İnanıram ki, etdiyi səhv, gələcəkdə bu tip oyunlarda ona dərs olacaq.

- “Şerif”lə oyundan sonrakı mətbuat konfransında bildirmişdiniz Sumanın günahı nə dərəcədə çoxdusa, o qədər də böyük cəza alacaq. Maraqlıdı, ona cəza verildi?
- Cəza vermək tərəfdarı deyiləm. Bəlkə də ən az cəza verən məşqçiyəm. Hötmətsizliyi özünə qarşı elədi. Təbii ki, cəza olacaq. UEFA-nın verdiyi cəza qərarını gözləyirəm. Onların qərarından sonra az da olsa cəza verəcəyik. Amma bundan sonra lap 200 minlik cəza verilsə də mənimçin önəmli deyil. Bu qırmızı vərəqəyə görə böyük uğuru əldən verdik. Əsas səbəb kimi bunu görürəm. Etdiyi hərəkətlə həm özünü, həm də bizi cəzalandırdı.

- Bu komandaya qarşı hazırlıq müddəti az oldu. Rəqibinizi nə dərəcədə təhlil etdiniz?

- Ümumiyyətlə tanımadığın rəqiblə qarşılaşdıqda, nə qədər analiz etsəndə onu yaxşı tanımırsan. Lakin yenə də çalışırıq ki, rəqibi düzgün təhlil edək. Əsas analiz sabah meydanda olacaq. Biz imkan daxilində yaxşı istirahət etmişik. Oyunun 70-80 dəqiqəsin azlıqda oynadıqlarına görə komandaya 1 gün də əlavə istirahət verdik. “Şerif”lə müqayisə etdikdə rəqib daha təşkilatlanmış komandadı. Oyunçuları bir-birini yaxşı tamamlayır. Bu üzdən də komanda şəklində mübarizə aparır. “Şerif”in futbolçuları isə daha çox individual cəhətdən mübarizə aparırdı. Çalışacayıq ki, qələbə qazanarq, üstünlük yaradaq. Hər şey sabah meydanda bəlli olacaq.

- Bildirdiniz ki, rəqib beşli müdafiə ilə oynayır. Buna görə sisteminizdə hansısa dəyişiklik olacaq? Start heyətdə hansı dəyişikliklər gözlənilir?
- Bu suallara cavab versəm, qarşı tərəfə material vermiş olaram. Çalışacayıq ki, sabah ideal “11-lik” seçək. Ola bilər ki, hansısa oyunçunu ilk dəqiqələrdə düşünüm amma ikinci hissədə meydana daxil edim. Rəqibə qarşı müəyyən sistemimiz var.

- "Şerif"lə matçda qazaxıstanlı baş hakimi gördükdən sonra "bizim hakimlər şükürlü imiş" deyə, düşündünüz? 
- Həmişə bizim hakimlərin səviyyəsindən razılıq etmişəm. Amma hamısından yox. Bəli bir neçə hakimlə bağlı xüsusi narazılığımız olub. Çünki, eyni səhvlər təkrarlanıb. O ki, qaldı müqayisəyə heç vaxt onların hakimləriylə müqayisə etmərəm. Bizim hakimlərin səviyyəsi yüksəkdi. Hakimin idarəçiliyinə gəlincə, uduzmuşuq. Danışığım bəhanə sayılacaq. Amma oyunun təkrarında səhvlər daha qabarıq göründü. Lakin məğlub olmağın səbəbi hakim səhvləri deyil, azlıqda qalmağımız idi. Belədə oyunun təkrarına baxdıqda, “Şerif” ə nisbətən təhlükəli məqamlarımız daha çox oldu. Əsasən də standart vəziyyətlərdən. Rəqibin isə vurduğu qollar xaric elə də bir təhlükəli vəziyyəti olmadı. Ancaq həmin gün onların günü idi. Hər şey onların xeyrinə oldu. Buna görə də növbəti mərhələyə adladılar.

KAMAL SƏFƏR