Şahin Diniyev: “İddiamız qalmayıb, mövsüm bizim üçün bitib”
"Səbail” Misli premyer-liqasının 35-ci turunda öz meydanında "Neftçi”yə 3:0 hesabı ilə məğlub olub.
“Football-plus.az” xəbər verir ki, Bayıl təmsilçisinin baş məşqçisi Şahin Diniyev oyundan sonra keçirilən mətbuat konfransında jurnalistlərin suallarını cavablandırıb:
“Nə desəm, bilmirəm. Nəticə odu ki, “Neftçi” qələbə qazandı. Oyuna yaxşı başlamışdıq. Qol vəziyyətlərimiz daha çox idi. Hesab açıldıqdan sonra rəqib irəli atıldı. Sona qədər oynamalı idik. “Neftçi”nin qələbəsinə kölgə salmaq istəmirəm, amma oyunun hesabı 3:0 olmamalı idi. “Sabah”a məğlub olduqdan sonra futbolçuları oyuna kökləmək çətindi. İddiamız qalmayıb, mövsüm bizim üçün bitib. Növbəti ilə hazırlaşmalıyıq”.
– Məğlub olmağınıza əsas səbəb nə idi?
– Əsas keyfiyyət məsələsidi. Oyunçularımı aşağılamaq istəmirəm, amma rəqib futbolçuların fərdi ustalıq səviyyəsi bizdən üstündü.
– Mövsümün sonundu deyə heyətdə bəzi dəyişikliklər etmişdiniz?
– Futbolçuları qazanmaq istəyirdik. Hüseynəli Quliyev və Samir Abdullayev yaxşı çıxış etdi. Rotasiyalar etmək istədik. Dediyim kimi, mövsüm bizim üçün bitib, ona görə də futbolçuları qazanmalıyıq. Həmçinin boşluqlarımızı görüb, problemləri həll etmək əsasdı.
Digər xəbərlər
