“Real”dan ayrılan Naço Fernandes üçün vida mərasimi təşkil ediləcək.

Bu barədə İspaniya klubunun saytı məlumat yayıb.
Mərasim iyulun 24-də “Santyaqo Bernabeu” stadionunda keçiriləcək. Tədbirdə klubun prezidenti Florentino Peres də iştirak edəcək. Rəsmi məlumatda 34 yaşlı müdafiəçini ailəsi və “Real”ın keçmiş futbolçularının müşayiət edəcəyi də bildirilib. Qeyd edək ki, Naço karyerasını Səudiyyə Ərəbistanında - “Əl-Kadisiyə”də davam etdirəcək.

“Real”ın yetirməsi bu komandanın heyətində 350-dən çox oyun keçirib və 19 qol vurub. Naçonun “Real”la 6 dəfə Çempionlar Liqasının, 4 dəfə La Liqanın, 2 dəfə İspaniya kubokunun, 5 dəfə İspaniya Superkubokunun və 4 dəfə UEFA Superkubokunun qalibi olduğunu da bildirək.