Azərbaycanın avrokuboklardakı qüruru “Qarabağ” bu gün tarixində 21-ci dəfə qitə səhnəsində mübarizəyə başlayır.

Ağdam klubunun, eləcə də baş məşqçi Qurban Qurbanovun avrokuboklarda iştirakla bağlı o qədər rekordu, ilki var ki, saymaqla qurtarmaz. Səfərdə ilk xalı qazanmaqdan, ilk dəfə mərhələ adlamaqdan tutmuş ən sürətli het-trikə, ilk böyükhesablı səfər qələbəsinə, oyun və qol sayındakı liderliyə qədər. Ardıcıl 10 il qrupa düşmək isə nəinki Azərbaycan, hətta bütün postsovet məkanı klublarının həsəd apara biləcəyi uğurdu.

Və “Qarabağ” bu gün yeni yola çıxır. Azərbaycanlı futbolsevərlər yenə çempiondan qrup mərhələsinə vəsiqə gözləyir. Əlbəttə, könül istəyərdi ki, bu, Çempionlar Liqasının qrup mərhələsinə vəsiqə olsun. İnsafən, püşk də ağdamlılara xoş üz göstərib. “Linkold Red İmps” səddini, ardından “Ludoqorets” – “Dinamo-Minsk” cütünün qalibini sıradan çıxarmaqla minimum vəzifənin öhdəsindən gəlmək olar. Bunlar sonranın işidi. İndi isə “Qarabağ”ın avrokuboklarda keçdiyi yola nəzər salaq.

39 ölkədən rəqibi olub
“Qarabağ” indiyə qədər Avropanın 39 ölkəsindən olan klublarla qarşılaşıb. “Ludoqorets” “Dinamo-Minsk”i keçib ağdamlılara rəqib olarsa, Bolqarıstan bu siyahıya 40-cı ölkə kimi düşəcək. Qurban Qurbanovun rəhbərlik etdiyi komanda Almaniya və Fransa təmsilçiləri ilə 10, Polşa təmsilçiləri ilə 9 dəfə qarşılaşıb.

Аlbaniya 4 2 2 0 5-0
Аlmaniya 10 0 2 8 8-20
Аvstriya 2 1 0 1 2-3
Belarus 2 0 1 1 1-2
Belçika 6 3 0 3 5-7
Cəbəllütariq 2 2 0 0 6-1
Çexiya 8 0 4 4 4-16
Danimarka 4 1 0 3 2-12
Farer adaları 2 0 2 0 1-1
Finlandiya 6 4 1 1 8-5
Fransa 10 1 3 6 7-20
Gürcüstan 2 2 0 0 6-0
İngiltərə 6 0 0 6 1-18
İrlandiya 2 1 1 0 4-1
İsrail 6 2 2 2 4-4
İspaniya 6 0 2 4 2-12
İsveç 6 5 0 1 9-2
İsveçrə 6 3 2 1 9-7
İtaliya 6 0 1 5 3-12
C.Kipr 8 3 3 2 13-11
Yunanıstan 4 3 1 0 6-0
Macarıstan 2 1 1 0 4-2
Qazaxıstan 2 2 0 0 4-2
Litva 2 2 0 0 7-0
Lüksemburq 4 2 2 0 8-3
Malta 2 2 0 0 5-0
Moldova 7 3 2 2 9-6
Monteneqro 2 1 1 0 1-0
Niderland 4 0 3 1 2-4
Ş.İrlandiya 4 2 1 1 7-6
Norveç 5 2 3 0 4-2
Polşa 9 5 2 2 19-11
Portuqaliya 4 1 0 3 7-13
Ş.Makedoniya 5 4 1 0 11-2
Şotlandiya 4 2 1 1 4-2
Slovakiya 2 0 0 2 0-4
Sloveniya 2 2 2 0 4-1
Türkiyə 2 0 0 2 2-5
Ukrayna 4 2 0 2 3-3

190-ı keçəcəklər
“Qarabağ”ın son illər avrokuboklarda müntəzəm 14-18 oyun keçirdiyini və bu il də ən azı həmin qrafikə sadiq qalacağını nəzərə alsaq, 190 oyun həddinə çatmaq, 200-ün astanasına qədər irəliləmək tam realdı. Xatırladaq ki, ağdamlılar indiyə qədər avrokuboklarda keçirdiyi 176 oyunun 66-da qələbə qazanıb, 64-də uduzub, 46 oyun isə heç-heçə bitib. 176 oyunun turnirlər üzrə bölgüsü belədi: UEFA kuboku/Avropa Liqası – 101, Çempionlar Liqası – 51, Konfrans Liqası – 16, Kuboklar Kuboku – 4, İntertoto Kuboku – 4.

“Qarabağ”ın turnir hədəfləri öz yerində, avrokubok mövsümü Abdulla Zubir üçün də böyük önəm daşıyır. İndiyə qədər “Qarabağ”ın heyətində avrokuboklarda keçirdiyi 84 oyunda 14 qol vuran fransalı bu rəqəmləri yuvarlaqlaşdıra (100, 20) bilər. “Qarabağ”ın heyətində avrokuboklarda ən azı 7 qol vuran futbolçuların siyahısı: Abdulla Zubir – 14, Reynaldo – 11, Kadi Borges – 9, Riçard Almeyda, Dani Kintana – 8, Filip Ozobiç, Əfran İsmayılov, Miçel – 7.

ORXAN