Allaha, “Linkoln” camiəsinə və 33566 cəbəllütariqliyə acıq getməsin, mənə elə gəlir ki, “Qarabağ” üçün Çempionlar Liqasının cari mövsümü iyulun 26-da – “Rakuv”a qarşı səfər oyunu ilə başlayacaq.

Bir o qalmışdı ki, ardıcıl 9 dəfə qrupa vəsiqə qazanan komanda poçtalyon-moçtalyona uduzsun! Polşadan münasib nəticə ilə dönürsən, sonra da 40-50 min azarkeşin önündə 3-cü mərhələyə adlamaq vəzifəsinin öhdəsindən gəlirsən. Bəs sonra? Öz aramızdı, bugünkü püşkatmadan sonra bu yol mənə çox asan gəldi. Ötən il 3-cü mərhələdə “Ferentsvaroş” kimi Avropa məşhuru ilə qarşılaşmalı olan Azərbaycan çempionu bu dəfə "Aris" - BATE cütünün qalibinin öhdəsindən gəlməlidi. Halbuki püşk “Şerif” – “Makkabi” cütünün qalibini və ya AEK-i də yolumuza çıxara bilərdi. Püşk adı o gözəgörünməz gözəlin “Qarabağ”a və dolayısıyla Azərbaycan futboluna yazığı gəldi. Düşündü ki, UEFA-nın əmsallar cədvəlində 17-ci olan İsrailin və ya 20-ci olan Yunanıstanın çempionunun Azərbaycanda nə işi var...

Zarafatsız-filansız, “Qarabağ”ın bəxtinə tam münasib cüt düşdü. Düzdü, Cənubi Kipr də əmsallar cədvəlində ölkəmizdən 4 pillə irəlidədi, amma bütün hallarda “Aris” və ya BATE İsrail, Yunanıstan çempionlarına tay tutula bilməz. Odu ki, “Qarabağ” “Rakuv”u keçdisə, cari avrokubok mövsümü üçün ilk hədəfinə çatacaq, yəni Konfrans Liqasının qrupuna düşəcək. Bu gün üçün əsas vəzifə necə olur-olsun, Polşanın ÇL təcrübəsi olmayan çempionunu yoldan kənarlaşdırmaqdı. Sonra bizdə ölkə çempionatı da başlayacaq, “Qarabağ” intensiv oyun qrafiki yaxalayacaq, kəsəsi, uğurların davamı öz-özünə gələcək. Getdik!

ORXAN