Taylandda istədiyini ala bilməyib, Türkiyədə baş qatandan sonra Ramil Şeydayev Azərbaycana döndü.

Doğrusu, bu dönüşün reallaşacağı gözlənilən idi. Lakin futbolçunun karyerasının zirvəsini yaşadığı “Qarabağ”a dönüşü gözlənildiyi halda, o, fərqli addım ataraq “Neftçi” ilə müqavilə imzaladı. Belədə Şeydayev ölkədə büdcəsi ən yaxşı olan üç klubun (“Sabah”, “Qarabağ”, “Neftçi”) da heyətində forma şansı qazandı. Onsuz da Ramil yaxşı pul qarşılığında “Buriram Yunayted”ə keçməklə karyerasını uçuruma doğru itələdi. Taylandda isə axtardığı çempionatı, xoşbəxtliyi tapmayıb, yenə yaxşı məvacib qarşılığında Türkiyənin 1-ci liqa təmsilçisi “Kocaelispor”a üz tutdu. Düzünü desəm, Ramil bəlkə də ən şanslı futbolçudu. 28 yaşı olmasına baxmayaraq, yaxşı pul qazanacağı klubları çox tez tapır. Çox güman, “Qarabağ”a yox, “Neftçi”yə gəlişinin əsas səbəbi də budu. Pul və ya karyera hər futbolçunun öz seçimidi. Bu barədə onun öz düşüncəsi, strategiyası var. Bu üzdən də biz, sadəcə, mövzunun görünən tərəfini tənqid edə bilərik. Görünən də odu ki, artıq Ramili karyera yox, pul maraqlandırır. İşin də maraq doğuran qismi burasındadı ki, bizim gördüyümüzü klub rəhbərliyi görmür?

Son iki mövsüm ərzində 4 komanda dəyişən, əsas məqsədi pul dalınca qaçmaq olan bir futbolçu komandaya nə verə bilər? “Ağ-qaralar”ın yeni baş məşqçisi Roman Qriqorçuk Ramil barədə xoş fikirlərini bölüşdü. Əlbəttə, o, potensiallı və texnikalı futbolçudu. İstər “Qarabağ”dakı, istərsə də millidəki dönəmində oyunuyla bunu sübut edib. Lakin son mövsümdə “Kocaelispor”un heyətində çıxdığı 16 matçda yalnız 1 dəfə fərqlənən hücumçunun məhsuldarlığından nə qədər yararlanmaq olar? Bütün bu olanlardan sonra Şeydayevin komandaya uyğunlaşması üçün elə azı 1 il lazım gələcək. Onun “Kocaelispor”dakı bir sıra oyunlarını izlədiyim üçün bu qənaətdəyəm. Ümumiyyətlə, Ramilin qış fasiləsinə qədər yaxşı performans sərgiləyəcəyini düşünmürəm.

KAMAL SƏFƏR