Bu gün Avropa Liqasının 1-ci təsnifat mərhələsinin "Zirə" - "Şerif" matçı ilə bağlı mətbuat konfransı keçirilib.

"Football-plus.az"ın məlumatına görə, "qartallar"ın baş məşqçisi Rəşad Sadıqov əvvəlcə oyun haqda danışıb:

- Oyundan əvvəl danışmaq çətin olur. Xüsusilə mən bunu xoşlamıram. Onu deyə bilərəm ki, rəqibin gücünü dərk edirik. Düzdü, ilk oyunda qələbə qazanmışıq. Lakin rəqib böyük motivasiya ilə oynayacaq. Yaxşı hazırlaşmışıq. Futbolçuların matça yanaşma tərzi və ciddiyyəti məni qane edir. Yeganə iş indiyə qədər olanları meydanda göstərməkdi. Avrokubok matçları həmişə gərgin keçib. Düşünürəm ki, bizi səfərdəkindən daha çətin oyun gözləyir. Orda uduzsaydıq da, belə olacaqdı. İlk hissədən üstünlüyün bizdə olmasını istəyirik. Hər ssenariyə hazır olmalıyıq. Ümid edirəm ki, mərhələ keçən tərəf biz olarıq.

- Penalti seriyasına hazırlaşmısızmı?
- Penaltilərə hazırlaşmağı sevmirəm. Ölkə kubokunda belə ehtimal olanda da hazırlaşmamışıq. Amma hər ehtimala hazır olmalıyıq. Səfərdə məğlub olsaq da, belə deyəcəkdim. Başqa səbəb yoxdu. Müasir futbol ev-səfər oyunlarında fərq olmadığını göstərir. Komanda şəklində hər ssenariyə hazır olmalıyıq. İstəyirik ki, cütün taleyi 90 dəqiqədə xeyrimizə həll olunsun. Mövsümün əvvəlidi, optimal formada deyilik.

- Bilirik ki, komanda daha çox hesabı qorumağa çalışacaq. Bunun əks təsiri də ola bilər. “Zirə” meydana turu keçməyə yoxsa qalib gəlməyə çıxacaq?
- İkisi də eynidi. Strategiya ilə bağlı sualları cavablamayacam. Oyun planından sabah danışsaq, daha yaxşı olar. Təbii ki, üstünlüyümüz var. Dünya futbolunda bir qol belə psixoloji hala təsir edir. Komandalardan biri irəli atılır, o biri ehtiyatlı oynayır. Başa düşürük ki, rəqib istəkli olacaq. Düşünməyə bir həftə vaxtları olub. Təcrübəli komandadı. Nəticəni xeyirlərinə dəyişməyə çalışacaqlar.

- Komanda hücumlarda "dişsiz" görünür". Problem nə ilə bağlıdı?
- Problem olduğunu düşünmürəm. Hücumlarımız var idi. Bir zərbəmiz oldu, o da qol. İlk hissədə Ceyhun topu ram etsəydi, fərqlənə bilərdi. Son ötürmələrdə daha dəqiq olmalıydıq. Biz də onlara elə epizod verməmişik. Hər iki komanda son dəqiqələrdə fərqlənməyə imkan vermir. Müasir futbolda belə zərbələri yerinə yetirmək çətinləşib. Tərəflər qol buraxmamağa çalışırlar. Buna da problem deməzdim. Qarşımızda qol buraxmaq istəməyən rəqib var. Çempionatda 7-ci turda səhv etsən, sonra düzəldə bilirsən. Burda isə hamı daha diqqətli oynayır. İstəyərik ki, sabah daha kəsərli olaq.

- İlk oyunda Ceyhun və Rüstəm özünü yaxşı tərəfdən göstərə bilmədi. Sabah heyətdə rotasiyalar gözlənilirmi?
- Nəzərə alaq ki, mövsümün ilk oyunu idi. İstər fiziki, istər psixoloji baxımdan komandadan razı qaldım. Mərhələ keçmək istəyiriksə, daha yaxşı olmalıyıq. Səfərdəki nəticə bizə sərf etməyə bilər. Çaışacağıq sabah yaxşı olaq.

- Komandada itkilər varmı?
- Bizi narahat edən məqamlar var. Amma bölüşə bilməyəcəm.

- Volkovda nə kimi dəyişiklər hiss etdiz?
- Oyunboyu rotasiyalı oynadıq. Başlayanda Utziqlə başladıq. Dəqiqələr ötdükcə Volkov irəli keçdi. Sevinirəm ki, yenidən bizimlədi. Getməsini də istəmirdim.

- Oyuna tam hazırsızmı?
- Psixoloji hazırlıq hər şeydən önəmlidi. Bu baxımdan hansısa problem yoxdu. Futbolçular sabahkı oyunun məsuliyyətini dərk edilər. Doğma azarkeşlər önündə oynayacağıq. Bunun müsbətlə yanaşı, mənfi tərəfləri də var. Həyəcanı üstümüzdən tez atmalı, ən yaxşı oyunumuzu oynamalıyıq.

- Vaxtilə “Makkabi”yə 0:3 uduzan komanda “Şerif”i məğlub etdi. Bu müddətdə nə dəyişdi? Rəşad Sadıqov indi daha təcrübəlidi, yoxsa heyət daha keyfiyyətlidi?
- "Makkabi"yə qarşı Bakıdakı oyuna pis başlamamışdıq. Fərdi səhvlərdən qollar buraxdıq. Qol epizodlarımız da var idi. Fərqlənə bilmədik. Səfərdə isə elə komandaya qarşı istəkli oynaya bildik. Həm də rəqib rahatlaşmışdı. İkinci oyun uğurlu keçdi. Səfərdən qələbə ilə dönüb, evdə oynamaq bizim üçün yeni təcrübədi. Bu sınaqdan başıuca çıxmağa çalışacağıq.

- Azarkeşlərə çağırış edirsizmi? Nəzərə alaq ki, "Zirə" yeni komanda olduğundan tərəfdarlarının sayı azdı.
- Azarkeşimizin az olduğunu deməzdim. Mənim üçün say yox, keyfiyyət önəmlidi. “Zirə” azarkeşləri həm yaxşı, həm də pis günümüzdə yanımızdadı. Əminəm ki, stadiona gəlməyənlər də oyunu televizayadan izləyəcək. Sıxıntılar varsa, ən azı telekanalda bizi izləyib, dua etsinlər.

- Volkovun gəlişiylə "9 nömrə" probleminin həll olunduğunu demək olar?
- Onun "Zirə"də olması bizi çox sevindirir. Futbolçu komandasını dəyişə bilər. Bu normaldı. Ondan razıyam və daha yaxşı oyun gözləyirəm.

KƏNAN BAHADIR