“Sumqayıt” stadionla bağlı problemləri həll etməkdədi - Məşhur sayt Papunaşvilini bu komandanın oyunçusu kimi göstərir
Konfrans Liqasının 2-ci təsnifat mərhələsindən mübarizəyə qoşulacaq “Sumqayıt” Macarıstan təmsilçisi “Fehervar”la ev oyununu Mehdi Hüseynzadə adına şəhər stadionunda keçirməyə israrlıdı.
Bilindiyi kimi, bir müddət öncə məşhur “Sky Sport” həmin qarşılaşmanın keçiriləcəyi yer kimi “Kapital Bank Arena”nı qeyd etmişdi. Çünki UEFA-nın müfəttişləri Mehdi Hüseynzadə adına stadionda bir sıra nöqsanlar görmüş və belədə orda oyun keçirməyin mümkünsüzlüyünü klub rəhbərliyinə bildirmişdi. Klubun mətbuat katibi Zaur Xudiyev isə qəzetimizə açıqlamasında problemlərin iyulun 10-na qədər həllini tapacağını bildirmişdi. Vaxt ötdü, vədə yetişdi, deyilən gün çatdı. Biz də bu üzdən Zaur bəylə yenidən əlaqə saxladıq. Bəs hazırda stadionun durumu nə yerdədi? Xudiyev sualımızı belə cavabladı:
“Hazırda stadiondakı nöqsanlarla bağlı işlər davam edir. UEFA bizə konkret tarix qoymamışdı. Sadəcə, öhdəlik götürmüşdük ki, oyun tarixinə qədər UEFA-nın bütün tövsiyələrini yerinə yetirəcəyik. Həmin vaxta qədər bütün işlər başa çatdırılacaq. Yəqin ki, UEFA nümayəndəsi oyundan bir neçə gün əvvəl Azərbaycana gələcək və stadionun vəziyyətini yerində yoxlayacaq. Ancaq istənilən halda, işləri həmin zamana qədər çatdıracağıq”.
Xatırladaq ki, “Sumqayıt”la “Fehervar” arasındakı ilk oyun iyulun 25-də Sumqayıtda keçiriləcək.
Yeri gəlmişkən, Avropada mübarizə aparacaq klublar arasında “Sumqayıt” passivliyi ilə diqqəti çəkir. “Gənclik şəhəri”nin komandası indiyə qədər cəmi iki transfer açıqlayıb: Rəhim Sadıxov və Fernando Medeyros. Buna baxmayaraq, dünyaca məşhur “flashcore.com” saytı “Kəpəz”dən ayrılan gürcüstanlı futbolçu Georgi Papunşvilini “Sumqayıt”ın üzvü kimi təqdim edir. Klub rəsmisi bu məsələni belə şərh etdi:
“Orda yanlışlıq var. Papu “Sumqayıt”a gəlmir, ümumiyyətlə, belə bir ehtimal yoxdu. Həmin portal uzun müddətdi onu bizim oyunçu kimi göstərir. Lakin nə bizim ona marağımız olmayıb, transfer etməmişik”.
KAMAL SƏFƏR
Digər xəbərlər
