UEFA avrokubokların 2024/25 mövsümündə iştirak edəcək bütün klubların siyahısını açıqlayıb.

Siyahıda “Jirona” və “Mançester Siti”nin də adı var.

Xatırladaq ki, mayın əvvəlində bu komandalardan birinin Çempionlar Liqasına (ÇL) buraxılmaya biləcəyi haqda rəsmi məlumat yayılmışdı. Klubların sahibinin eyni şirkət – “City Football Group” olması UEFA-nı araşdırmaya başlamağa vadar etmişdi. Qitə futbol qurumunun ötən ay hər iki kluba etdiyi xəbərdarlıq lazımi nəticə verib. Qeyd edək ki, “City Football Group”un “Jirona”dakı sahiblik bölgüsü 30 faiz azaldılmalı idi. Əks halda bu komanda tarixində ilk dəfə vəsiqə qazandığı ÇL-ə yox, Avropa Liqasına (AL) buraxılacaqdı.

Bu baxımdan “Mançester Yunayted” ilə “Nitsa” da problemlə üzləşmişdi. “Ineos” şirkətinə məxsus olan klublardan birinin AL-ə buraxılmamaq ehtimalı vardı. Lakin İngiltərə və Fransa təmsilçiləri UEFA-nın müvafiq tələbini yerinə yetirdikləri üçün eyni avrokubokda iştirak hüququ qazanıblar.

Qeyd edək ki, UEFA-nın qaydaları bir sahibə məxsus olan klubların eyni avrokubokda iştirakını qadağan edir. Lakin təşkilat son illər bu planda müəyyən dərəcədə yumşalmaya gedir: problem şirkətin klublardan birindəki payının azaldılması yolu ilə həllini tapır.