Bu yay avrokuboklarda meydana çıxacaq ilk komandamız “Zirə”di.

“Qartallar” bu gün Avropa Liqasının 1-ci təsnifat mərhələsində mübarizəyə başlayacaq. Rəqib yaxşı tanıdığımız “Şerif”di. Həmişə olduğu kimi, bu dəfə də avrokubok oyununu canlı yayınlayacaq kanal “CBC Sport”du.

Avropa Liqası, 1-ci təsnifat mərhələsi
Şerif (Moldova) – Zirə 0:1
Davit Volkov, 88.
Hakimlər: ALESSANDRO DULİÇ, Paskal Hirzel, Susann Künqa, Anoyen Kanaqasinqam (hamısı İsveçrə).
11 iyul. Tiraspol. “Şerif Arena”. Saat 21.00.

“Zirə” yetərincə uğurlu mövsüm keçirərək kubokun finalına çıxmaqla yanaşı, premyer-liqada ikinci pilləyə yiyələndi. Rəşad Sadıqovun komandası mövsüm ərzində “Qarabağ”dan başqa bütün klublara “diş göstərərək” tutduğu yeri haqq etdiyini sübuta yetirdi. Çempionat boyunca qızğın mübarizənin şahidi olduğumuzdan “qartallar”ın israrlı, əzmkar və mübariz kollektiv sayəsində hədəfə çatdığına şübhə yoxdu. Baxmayaraq ki, komandanın xüsusilə oyun tərzi tez-tez qınaq obyektinə çevrilirdi. Lakin heç nə “Zirə”nin tarixində ikinci dəfə (debüt: 2017/18) Avropa Liqasına vəsiqə qazanmasına mane olmadı.

Hər halda, bütün belə məsələlər geridə qalıb. İndi önə baxmaq lazımdı ki, qarşıda Moldova nəhəngi “Şerif”i görürük. Yuxarıda rəqibə nəyə görə tanış dediyimizi yəqin bilirsiz. Hər ehtimala qarşı xatırladaq ki, “Şerif” daha əvvəl avrokuboklarda üç dəfə “Qarabağ”a rəqib olub. 2017/18 mövsümündə Ağdam təmsilçisi Çempionlar Liqasının 3-cü təsnifat mərhələsində iki matçın nəticəsinə əsasən tiraspolluları üstələyib - 0:0, 2:1. “Köhlən atlar” 2018/19 mövsümündə Avropa Liqasının pley-offunda səfərdə uduzsa da (0:1), Bakıda əvəzini çıxıb - 3:0. Qurban Qurbanovun komandası sonuncu dəfə 2020/21 mövsümündə Çempionlar Liqasının 2-ci təsnifat mərhələsində “Şerif”i yenib - 2:1. Həmin vaxt cütün taleyi koronavirus üzündən bir oyunda həll olunub.

Moldova klubunun çətin günlər yaşadığını yazmışdıq. Rusiya – Ukrayna mübaribəsinin fəsadları klubun rəhbəri və əsas maliyyəçisi Viktor Quşanın planlarını pozub, dəqiqi desək, klubun maddi dayaqları sarsılıb. Nəticədə çempionluğu “Petrokub”a “bağışlayan” komandanın avrokuboklarda da büdrəmə ehtimalı böyükdü. Hətta “Zirə” istəsə, ilk mərhələdəcə! Amma...

Yuri Quranın komandası yay fasiləsindən maksimum yararlanmaqdadı. Geridə qalan dövrdə qüsurlu mövqelər gücləndirilib. Kollektiv yeni və gənc futbolçular transfer etməklə yanaşı, üç yoxlama oyununda uğurlu nəticə qazanıb. Əlbəttə, formal matçlar önəm kəsb etmir. Yenə də “Şerif”in düşərgəsində motivasiyasızlıq və ya ciddi nöqsanlar hiss olunmur. Odu ki, şansları yarı-yarıya dəyərləndirsək, yanılmarıq. Düzdü, “Zirə”nin heyəti də yetərincə zəngindi. Lakin “qartallar”ın hücum xəttindəki çatışmazlıqlar və cəmi iki yoxlama oyununun keçirilməsi ehtiyatlı danışmağa sövq edir. Yenə də pessimist olmaq istəmirik. Arzulayaq ki, “Zirə” bütün rıçaqlarından istifadə edərək səfərdən sərfəli nəticəylə geri dönəcək.

KƏNAN BAHADIR