Nəhayət, Erik ten Haqın aqibətinə rəsmən aydınlıq gəlib. Hələ bir neçə ay əvvəl onun “Mançester Yunayted”ən istefaya göndəriləcəyi haqda xəbərlər səngimirdi.

Lakin rəhbərlik baş məşqçi ilə əməkdaşlığı davam etdirməyi lazım bilib.

İngiltərə klubunun rəsmi saytının xəbərinə görə, komanda premyer-liqada son mövsümü 8-ci yerdə başa vursa da, 54 yaşlı mütəxəssislə yeni müqavilə imzalanıb və niderlandlı hazırkı postunda 2026-cı ilin yayına kimi qalacaq. Qeyd edək ki, Ten Haqın əvvəlki müqaviləsinin müddəti 2024/25 mövsümünün sonuna qədər nəzərdə tutulmuşdu.

O, MY-ni 2022-ci ilin yayından çalışdırır. Komandanın ötən mövsüm İngiltərə kubokunu qazandığını da yada salaq.

Yeri gəlmişkən, MY rəhbərliyi 250 əməkdaşını (ümumi işçilərin, demək olar ki, 1/4-ni) ixtisar etmək niyyətindədi. “The Athletic” qəzetinin yaydığı məlumata görə, klub 2024/25 mövsümünün startına qədər maliyyə xərclərini xeyli azaltmaq niyyətindədi. Hələ may ayında klubun qeyri-futbolçu heyətinə əslində öz istəkləri ilə istefa vermələri təklif olunub.

MY-nin əsas səhmdarı kimi qalan Qleyzer ailəsi biznes və futbol əməliyyatlarına nəzarəti INEOS şirkətinə təhvil verib. Məlumatda bunun Qleyzer ailəsinin klubun ortaq sahibi Cim Retkliffə və onun komandasına olan inamını göstərdiyi bildirilir. İxtisarlar klubun bütün departamentlərinə təsir edəcək, lakin xeyriyyə təşkilatı olan “Mançester Yunayted” Fondunun əməkdaşlarını əhatə etməyəcək.