Təcrübəli baş məşqçi Kurban Berdıyevin ötən aydan “Turan Tovuz”u çalışdırdığı hər kəsə bəllidi.

Rahatlıqla demək olar ki, onun təyinatı aydın səmada şimşək çaxmasına bənzədi. Ehtiram bəyin daha gənc Ayxan Abbasovla yolları ayırıb 71 yaşlı türkmənistanlını komandaya baş məşqçi təyin etmək qərarı nə qədər qınanılsa da, bir o qədər də alqışa tutuldu. Çünki təcrübəli çalışdırıcı indiyə qədər rəhbərlik etdiyi komandalar ilə əldə etdiyi uğurlar və getdiyi hər yerdə yaratdığı düzənlə adından söz etdirən bir şəxsdi.

Əbəs deyil ki, növbəti mövsüm üçün daha önəmli hədəflər planlayan klub rəhbərliyi ayıracağı maliyyəni göz önünə gətirərək, xərclədiyinin qarşılığını daha artıq şəkildə almaq istəyir. Doğrusu, Berdıyevin baş məşqçi təyinatından sonra edilən transferlər yaxşı mənada o qədər də əks-səda doğurmur. Lakin əksəriyyətin Rusiya “Rubin”indən tanıdığı Berdıyevin hər zaman işə müdafiədən başladığı bəllidi. Elə türkmənistanlı məşqçi də ilk növbədə iki gənc rus qolkiperi heyətə cəlb etməklə özünəməxsus addım atmış oldu. “Transfer pəncərəsi” hələ bağlanmadığına görə qarşıdakı günlərdə qalan mövqelər üçün də yeni simalar görmək mümkündü. Amma görməsək belə, yenə də təəccüblənməməliyik. Çünki bu Berdıyevdi...

Srağagün “Turan Tovuz” onun rəhbərliyi altında ilk matçına çıxdı. Rəqib isə 2-ci liqanın autsayderlərindən “Şəmkir” idi. Qarşılaşmanın favoriti aşkar şəkildə bəlliydi. Fəqət Tovuz təmsilçisinin 13 cavabsız qolla qalib gəlməsi bir qədər gözlənilməz oldu. Belədə Kurban müəllimin ilk qurbanı “Şəmkir” oldu. Yoxlama görüşü olmasına baxmayaraq, belə rəhmsizcəsinə davranmaqla indidən qalan premyer-liqa komandalarına subliminal mesaj verdi, “mən də varam” dedi. Tovuzlu azarkeşlər kimi, futbol ictimaiyyəti də qarşıdakı mövsümdə “Turan Tovuz”dan çox şey gözləyir. Zəngin təcrübəyə malik birinin çalışdırdığı komandanın premyer-liqaya rəng qatacağını gözləyirik. İnşallah, belə gözləntilər havada qalmaz.

KAMAL SƏFƏR