Niderlandlılar Fərdi Kadıoğluna psixoloji təzyiq göstərir
Bu gün AÇ-2024-ün 1/4 final mərhələsi çərçivəsində keçiriləcək Niderland – Türkiyə oyunundan öncə diqqət mərkəzində olan futbolçuların başında Fərdi Kadıoğlu gəlir.
Bu turnirdə öz oyunu ilə bir çoxlarını valeh edən və “Arsenal” başda olmaqla nəhəng klubların diqqətini çəkən istedadlı futbolçu Türkiyənin heyətində doğulduğu ölkəyə qarşı oynayacaq. O, 1999-cu ildə Arnemdə doğulub. Anası Dayane Kanadada doğulsa da, əslən niderlandlıdı. Atası Feyzulla isə türkdü. Fərdi futbolda ilk addımlarını, təbii ki, Niderlandda atıb və uzun illər bu ölkənin aşağı yaş qruplarından ibarət yığmalarında De Liqt, Malen, Qakpo kimi futbolçularla çiyin-çiyinə oynayıb.
2018-ci ildə “Fənər” o vaxt hələ heç kimin tanımadığı bu futbolçunu 1,4 milyon avroya “Neymegen”dən transfer etdi. İlk mövsümü “Fənər”in U-21 komandasında keçirən Fərdi Türkiyəyə hücumameyilli futbolçu kimi gəlsə də, Vitor Pereyranın dönəmində cinah müdafiəçisinə çevrildi. Bu mövqedə ulduzu parlamağa başlayan Kadıoğlu 2022-nin yanvarında yekun qərarını verərək Türkiyə yığmasında oynayacağını açıqladı. Onun indiki transfer dəyəri 20-25 milyon avro civarındadı. Bu arada niderlandlı futbolsevərlərin Fərdinin ailəsinə təhqiramiz mesajlar göndərdiyi məlum olub. Futbolçunun anası Dayane Niderlandın “De Gelderlander” nəşrinə açıqlamasında bunları deyib:
“Son günlər təhqirlərlə dolu mesajlar alırıq. Fərdi Türkiyə yığmasını seçdiyi üçün niderlandlılar onu “xain” adlandırır. Bu da bizi çox incidir. Bu insanlar həqiqətləri bilmir. Türkiyə Futbol Federasiyası ilk gündən Fərdiyə inandığını göstərdi”.
Futbolçunun atası Feyzullanın sözləri isə belə olub:
“Bu yaxınlarda “Fənərbaxça”nın stadionunda bütün tribunaların oğlumun lehinə təzahüratlar səsləndirdiyini eşidəndə tüklərim biz-biz olmuşdu. Ötən il onun Almaniyaya qarşı yoldaşlıq oyununda vurduğu qol məni çox qürurlandırdı. Türkiyə Fərdini bağrına basdı. Biz həmişə ona güvənmişik. Fərdi psixoloji cəhətdən güclüdü və bütün bunların öhdəsindən gələcək”.
