“Sabah” ötən mövsüm Kiyev “Dinamo”sundan icarə əsasında heyətinə cəlb etdiyi Kahim Parrisin birdəfəlik transfer hüquqlarına yiyələndi.

“Bayquşlar”ın 24 yaşlı vinger üçün Ukrayna təmsilçisinə nə az, nə çox - 600 min avro, yəni 1,1 milyon manat ödədiyi deyilir. Bəs Parris milyonluq futbolçudumu?
2023/24 mövsümündə çempionatda 29 matçda forma şansı qazanan yamaykalı cəmi 4 dəfə rəqib qapısına yol tapa bilib. Vinger mövsümün sonuna yaxın əsl potensialını ortaya qoyaraq, baxımlı futbol sərgiləməyi bacarıb. Hər halda, iştirak etdiyi bütün oyunlarda potensial, texnika, sürət baxımından öz mövqeyinin ən yaxşı əcnəbilərindən biridi. Sadəcə, dribliq cəhətdən müəyyən çatışmazlığı var. Sürəti hesabına bunu ört-basdır etməyi bacarır. Lakin nəticə həmişə ön planda olmalıdı. Yəqin ki, Krunoslav Renduliç və köməkçiləri müəyyən təhlil aparandan sonra Parrisin belə yüksək məbləğ qarşılığında “tələbələr”ə transfer olunmasına razılıq verib. Həmçinin futbolçunun artıq komandaya uyğunlaşdığını nəzərə alsaq, növbəti mövsüm üçün yaxşı nəticələr gözləyə bilərik.

KAMAL SƏFƏR