Misli premyer-liqasında mövsümün sonuna yaxınlaşırıq. Bu ərəfədə ənənəvi olaraq komandalarda baş verəcək dəyişikliklər haqda xəbərlər tirajlanır. Haqqında iddialar yayılanlar sırasında "Sabah" və fəallığıyla seçilən legionerlərindən Kahim Parris də var.

Bilindiyi kimi, yamaykalı futbolçu müqaviləylə Kiyev "Dinamo"suna məxsusdu. Masazır təmsilçisi onu ötən ilin sentyabrında 2023/24 "futbol ili"nin sonuna qədər icarəyə götürüb. Belədə oyunçunun komandayla yoluna davam edib-etməyəcəyi sual doğurur.

"Football-plus.az" ""Dynamomania.com" saytına istinadla xəbər verir ki, "Dinamo" Parrisin Ukraynaya qayıtmasında maraqlı deyil. Çünki yarımmüdafiəçi 2022/23 mövsümündəki çıxışıyla paytaxt təmsilçisini məmnun etməyib. Daha dəqiqi, 15 matçda şans verilən futbolçu 3 məhsuldar ötürməylə yadda qalıb, mövqeyindəki rəqiblərinə məğlub olub.

İndi "Dinamo" 2026-cı ilədək nəzərə tutulmuş müqaviləsinin olmasına rəğmən, Parrisi satışa çıxarmaq niyyətindədi. Müştərilər siyahısında ən iddialı klub isə "Sabah"dı.

"Dynamomania" Masazır təmsilçisinə bu fürsəti qaçırmamağı tövsiyə edir. Nəşr futbolçunun özünü məhz "Sabah"da "tapdığını” yazır.

Qeyd edək ki, "bayquşlar"ın heyətində bütün turnirlər daxil olmaqla 30 oyunda meydana çıxan Parris 4 qol, 8 məhsuldar ötürməylə yadda qalıb. "Sabah" futbolçu ilə yola davam etməkdə israrlıdı.

KƏNAN BAHADIR