Arda Gülər Çexiyaya qarşı oynayacaqmı?
Ölkəmizdə də çıxışı böyük maraqla təqib edilən Türkiyə yığması bu gün AÇ-2024-də qrupun sonuncu və həlledici oyununa çıxacaq.
2 turdan sonra aktivində 3 xal olan Türkiyə Çexiya ilə qarşılaşacaq. Çexlərin 1 xalı var. Aktivində 6 xal olan Portuqaliya artıq qrup liderliyini təmin edib. Yəni Türkiyəyə 2-ci pilləni tutmaq üçün uduzmamaq kifayət edəcək. Yeri gəlmişkən, ''ay-ulduzlular'' qrupu 2-ci pillədə tamamlasalar, 1/8 finalda Avstriya ilə qarşılaşacaqlar. Çünki Avstriya Niderland və Fransanı qabaqlayaraq gözlənilmədən D qrupunu lider kimi tamamladı.
Türkiyənin baş məşqçisi Vinçentso Montella Çexiya ilə oyunöncəsi mətbuat konfransında açıqlamalar verib. O, Portuqaliya ilə oyunda yüngül zədə üzündən start heyətində yer almayan Arda Gülərin son durumuna da toxunub:
''Arda meydanda uzun müddət qalacaq durumda deyil. Portuqaliya ilə oyunda ehtiyatda qalmasına tək mən qərar vermədim. Baş həkim, tibbi personalımız və onun özü ilə məsləhətləşdikdən sonra birlikdə bu qərarı verdik. Riskə getməmək üçün az oynamalı idi. Ona görə də nə qədər lazım idisə, o qədər də oynadı. Həqiqi fanatlarımız bizi start fitindən final fitinə qədər dəstəkləyəcək. Tənqid edənlərə xatırladım ki, bu, bizim ölkəmizin komandasıdı. Türkiyənin başqa yığma komandası yoxdu. Bu uşaqlar ölkəyə sevinc yaşatmaq üçün əllərindən gələni edirlər. Təzyiq hiss edirəmmi? Mən zatən 30 ildi təzyiq altındayam. Təzyiq bizim işimizin bir parçasıdı. Hər şey öz əlimizdədi. Başqa komandalardan asılı deyilik. Diqqətimizin dağılmasına imkan verməməliyik''.
Montellanın sözündən belə qənaətə gəlmək olar ki, Arda bu gün start heyətində olmayacaq. Bundan başqa qapıçı Mərt Günok ilə Orkun Kökçü zədə, müdafiəçi Əbdülkərim Bardakcı isə cəza üzündən Çexiya ilə oyunu buraxacaq.
ƏLİ
Digər xəbərlər
