Gürcüstanı yenməklə qrupa uğurlu başlayan Türkiyə yığması üçün 2-ci oyun heç də istənilən şəkildə keçmədi.

“Football-plus.az” xəbər verir ki, qardaş ölkənin komandası tarixi ərzində rəsmi oyunlarda heç vaxt məğlub edə bilmədiyi Portuqaliya önündə 3 cavabsız qolla uduzdu. Düzdü, Kriştiano Ronaldo karyerasında Türkiyəyə qarşı keçirdiyi 4-cü oyunda da qol vura bilmədi. Amma Portuqaliyanın bu matçda onun qoluna ehtiyacı olmadı. Türkiyənin zəif oyunu ilə yanaşı Vinçentso Montellanın heyətə əl gəzdirməsi sosial şəbəkələrdə və futbol mütəxəssisləri tərəfindən ciddi tənqid olundu. Belə ki, Gürcüstanla oyunun 4 əsas futbolçusu - qapıçı Mərt Günok, eləcə də Mərt Müldür, Arda Gülər və Kənan Yıldız müxtəlif səbəblərdən ilk ''11-lik''də yer almadı. Oyun günü Mərt Günokun zədə üzündən oynaya bilməyəcəyi məlum oldu və onun adı heç iştirak ərizəsinə də salınmadı. Belədə Montella qapıda ''Trabzonspor''un əsas qapıçısı Uğurcan Çakıra yox, bütün mövsümü ''Mançester Yunayted''in ehtiyat skamyasında keçirən Altay Bayındıra üstünlük verdi. Qapıda dəyişiklik məcburi xarakter daşıdısa, digər 3 futbolçunun ehtiyatda qalmasının səbəbləri bəlli olmadı. Mərt Müldür sona qədər oyunu ehtiyatda skamyada izlədi. Arda ilə Kənan isə yalnız hesab 0:3 olduqdan sonra meydana çıxdı. Montella oyundan sonrakı mətbuat konfransında ''Arda yorğun idi və zədələnnmək ehtimalı var idi'' açıqlamasını verdi. Amma bu açıqlama fanatları qane etmədi. Portuqaliyanın heyətində 41 yaşlı Pepenin də ilk oyundan sonra dincəlmək üçün Arda qədər zamanı olmuşdu. Amma Pepe heç bir yorğunluq hiss etmədən Türkiyəyə qarşı start heyətində meydana çıxdı və çox etibarlı oyunu ilə diqqət çəkdi. Final fitindən sonra daha bir diqqətçəkən olay yaşandı. Arda Gülər Kriştiano Ronaldoya əlini uzadaraq onunla salamlaşmaq istəsə də, portuqaliyalı superulduz özünü görməməzliyə vurdu! Sonda qeyd edək ki, Portuqaliya bu qələbə ilə nəinki pley-offa vəsiqəni, hətta liderliyi də təmin etdi. Türkiyəyə pley-offa vəsiqəni rəsmiləşdirmək üçün qrupun son oyununda Çexiyadan 1 xal almaq yetərli olacaq.

ƏLİ