“Eiraf edək ki, seçim gözlənilməz oldu. Belə təcrübəyə malik mütəxəssisin millimizə rəhbərlik edəcəyini heç kim düşünmürdü. Təbii ki, Portuqaliya yığması kimi komandanın baş məşqçisi olan və Avropa çempionu adını qazanan şəxsdən öyrənəcəyimiz çox şey var. Burda insanların yaşla bağlı narahatlığı normal qarşılanmalıdı. Çünki millidə işləmək asan məsələ deyil. Çox çalışmaq, futbolçularla əlaqə qurmaq vacibdi. Hətta ailəndən daha çox komandayla zaman keçirməlisən. Belədə çox böyük enerji sərf etmək lazımdı. Məncə, bunun öhdəsindən təkbaşına gəlmək mümkün deyil. Fernandu Santuşun yanında mütəxəssislərin olması vacibdi. O, komanda içində komanda qurmaq məcburiyyətindədi. Üstəlik, oyunları daim izləyən, baş məşqçiyə daim məlumatlar verən şəxslər olmalıdı. Onun bütün məşqlərə, oyunlara getməyə fiziki baxımdan imkanı olmayacaq. Amma gözləməliyik. Düşünürəm ki, məşqçilər olaraq ondan təcrübə qazana bilərik. Oyunçuların nə öyrənib-öyrənməyəcəyini deyə bilmərəm, məşqçilərimiz isə Santuşun təcrübəsindən bəhrələnə bilər. İnanırıq ki, qarşıdakı aylarda yerli məşqçilərlə görüşüb təcrübəsini paylaşacaq”.

“Azərbaycan millisini Portuqaliyayla qarışdırmaq yalnış olar. Çünki burda hər oyun qələbə qazanan, çoxlu qollar vuran futbolçular yoxdu. Burda nə Bernardo Silva, nə David Silva, nə də Kriştiano Ronaldo var. Təbii ki, bunun üstün cəhətləri də var. Santuş oyunçuları ruhlandırmaq, qələbəyə kökləmək kimi işlərin öhdəsindən asanlıqla gələ bilər. Ümumiyyətlə, onunla birlikdə yerli məşqçilər də çalışmalıdı. Azərbaycanlılar fürsətdən istifadə etməlidi. Qısası, belə mütəxəssisə ehtiyacı olan ölkəyik. İş orasındadı ki, bizim kifayət qədər vaxtımız yoxdu. Sentyabrda keçiriləcək oyunlara qədər millimizdə hansı səviyyədə dəyişiklik edəcəyi sual altındadı. Bu üzdən onun nəsə bacarıb-bacarmayacağını anlamaq üçün bir müddət gözləməli olacağıq. Yalnız onda daha geniş fikir bildirərik. Təyinatı indidən tənqid etmək düzgün olmaz”.