Portuqaliya yığmasından, nəhayət, gözlənilən istefa xəbəri gəldi.

Bu mundialda 1/4 finala qədər irəliləməsinə və 2006-dan bəri ən yaxşı nəticəsini göstərməsinə rəğmən, Portuqaliya ümidləri tam doğrultmadı.

Srağagün Portuqaliya Futbol Federasiyası (PFF) Fernando Santuşla yolların ayrıldığını rəsmən açıqladı. 68 yaşlı mütəxəssis 2014-cü ildən bu vəzifəni icra edirdi. Federasiyanın açıqlamasında həm qurum, həm də ölkə adından bu 8 ildə yaşanılanlara görə Santuşa minnətdarlıq bildirildi. Qeyd edək ki, Portuqaliya bu məşqçinin başçılığı altında AÇ-2016-nın və 2019-cu ildə Millətlər Liqasının qalibi olub. DÇ-2022-də isə “avropalı braziliyalılar”ın qarşısını turnirin əsas sürprizi sayılan Mərakeş kəsdi.

Ümumilikdə Portuqaliya Santuşun dönəmində keçirdiyi 109 oyundan 67 qələbə, 19 bərabərlik və 23 məğlubiyətlə ayrılmış oldu.

Maraqlıdı ki, Bernardo Silva, Joao Feliks, Pepe kimi yığmanın bir çox üzvü öz səhifəsində Santuş üçün vida sözləri yazsa da, Kriştiano Ronaldo hələ də bunu etməyib. Bu mütəxəssisin həm 1/8, həm də 1/4 finalda Ronaldonu ehtiyatda saxlaması böyük söz-söhbətə səbəb olmuşdu. Santuşun yerinə namizəd olan bir çox məşqçi var. Böyük ehtimalla bu, yerli, yəni portuqaliyalı mütəxəssis olacaq. Çünki namizədlərin arasında Ruy Vitoriya, Jorje Jezuş, Ruy Jorje, Paulo Bento, Karluş Keyruş, Paulo Souza və Joze Mourinyonun adı hallanır. Yerli futbol qurumu, necə deyərlər, bəxtini sınamaq qərarına gələrək ən birinci Mourinyoya təklif irəli sürüb.

Bilindiyi kimi, ünlü mütəxəssis hazırda “Roma”nı çalışdırır və İtaliya klubu onun iki postu birdən tutmasının tərəfdarı deyil. Ona görə də böyük ehtimalla Mourinyo yığma ilə “Roma” arasında seçim etməli olacaq. Uzun illərdi onun meneceri olan Jorje Mendeş PFF-nin prezidenti Fernando Qomeşlə danışıqlar aparmaqda davam edir. Son xəbərlərdə qeyd olunur ki, 59 yaşlı mütəxəssis ciddi seçim qarşısındadı və yığmanın başına keçmək perspektivi onu gündən-günə daha da çox cəlb edir. Mourinyo özü hələ ki bu məsələyə reaksiya bildirməyib.

RAMİL