“Bəli, mediada belə xəbərlər yer alır. Ancaq bu dəfə Portuqaliya mətbuatı yazmışdı. “Beşiktaş”a yaxın olan türkiyəli həmkarlarımla, eyni zamanda kluba yaxın olan futbol adamlarıyla da söhbətləşmişəm. Onlar da öz növbəsində bildirdi ki, “Beşiktaş”ın rəhbərliyinin və çalışdırıcısı Covanni van Bronkhorstun transfer siyahısında belə bir oyunçu yoxdu. Doğrudu, Juninyo həmin siyahıda yer almışdı və skautlar tərəfindən təklif edilmişdi. Xüsusilə də Samet Aybaba onun Avropa Liqasındakı çıxışlarını çox bəyənmişdi. Ola bilər ki, yenidən Juninyo üçün təklif irəli sürsünlər. Amma Andradeylə bağlı hansısa məlumat əldə edə bilmədim. Ola bilər ki, menecerlər vasitəsiylə təklif edilsin və “Beşiktaş” tərəfi bunu qəbul edib, transfer siyahısına əlavə etsin. Lakin rəsmi formada ciddi şəkildə Leandronun “qara qartallar”ın maraq dairəsində olması xəbərlər düzgün deyil. Yəqin ki, bu, Portuqaliya mediasına hansısa menecer vasitəsiylə ötürülüb. Bilindiyi kimi, “transfer pəncərəsi” dönəmində xarici mediada menecerlərlə idman portalları, nəşrləri çox sıx əlaqədə çalışırlar və gündəmə gətirməklə həmin transferlərin həyata keçirilməsində müstəsna rol oynayırlar. Bu da həmin qəbildən olan xəbərlərdən biridi”.