“Qarabağ”ın Juninyoya görə əziyyət çəkəcəyini düşünürəm” – menecer belə dedi
“Qarabağ”ın Avropadakı uğurlu çıxışı futbolçularının başqa ölkələrin klublarının maraq dairəsinə düşməsinə səbəb olub.
Əsasən də braziliyalı hücumçusu Olavio Juninyo diqqət mərkəzindədi. “Football-plus.az” xəbər verir ki, ona ən ciddi maraq göstərən komanda Türkiyə təmsilçisi “Beşiktaş”dı. “Qara qartallar” “Qarabağ”a 5 milyon avro təklif edir. Ağdam klubu isə 27 yaşlı futbolçu üçün 8 milyon avro tələb edir. Görəsən, “Beşiktaş”ın Juninyoya bu qədər pul təklif etməsi nə dərəcədə realdı? Onun real dəyəri nə qədərdi? “Qarabağ”ın belə ciddi maraq fonunda heyətini qoruyub-saxlaması mümkündümü? Bu suallarla təcrübəli menecer Vaqif Heydərliyə üz tutduq:
“Bu barədə elə yalnız mətbuatda, sosial şəbəkələrdə yazılanlar vasitəsi ilə xəbər tuturuq. Deyilənə görə “Beşiktaş” 5 milyon avro təklif edir, “Qarabağ” isə 8 milyon avro istəyir. Belə götürsək, bu qiymətlər realdı. Əlbəttə, daha dəqiqini bu işin içində olanlar bilir. Təkcə “Qarabağ”ın yox, bütün inkişaf edən, nəticə göstərən klubların oyunçularına maraq olur. Ağdam təmsilçisi Juninyonu saxlamaqda çətinlik çəkəcək. Amma saxlaya da bilər. İnanmıram ki, başqa oyunçularıyla bir o qədər problem olsun. Ancaq Juninyoya görə “köhlən atlar”ın əziyyət çəkəcəyini düşünürəm. Əlbəttə, könül istəyər ki, “Qarabağ” heyəti qorusun və daha yaxşı nəticələr göstərsin”.
KAMAL SƏFƏR
