Bilindiyi kimi, “Turan Tovuz” ötən həftə baş məşqçisi Ayxan Abbasovla yolları ayırdı.

Ardından bəzi aparıcı oyunçuların, konkret Şəhriyar Əliyevin də gedəcəyi ilə bağlı xəbərlər yayıldı. Amma kapitanla birillik yeni müqavilə imzalandı. Dünən Şəhriyarla əlaqə saxladıq, bəzi suallara cavab almağa çalışdıq.

-  “Turan Tovuz”la yeni müqavilə imzaladın. Başqa təkliflər var idi?
-    Bəli, başqa təkliflər də var idi. Amma “Turan Tovuz” rəhbərliyi ilə oturub ətraflı danışdıq. Və burda qalmağı daha üstün bildim. Karyeram üçün uyğun qərar olduğunu hesab edirəm.

 -  Komandan ardıcıl iki ildi 6-cı yeri tutur. Nəticə, mövsümün yekunları ilə bağlı nə deyərdin?   
- Komandamız bu il az xal yığmadı. Yeni yaranan klub olaraq, iki ildi mövsümü 6-cı yerdə başa vururuq. Bəlkə daha çox xal yığa bilərdik. Amma düşünürəm ki, bu nəticə də pis deyil.

-   Baş məşqçiniz Ayxan Abbasovun qəfil istefası hər kəsi təəccübləndirdi. Bir kapitan kimi bu hadisəni necə təhlil edərdin, sənin düşüncələrin nədi?
- Həqiqətən də baş məşqçinin istefası hər kəsi təəccübləndirdi. Bizim üçün gözlənilməz oldu. Mən də gözləmirdim. Əlavə nəsə deyə bilməyəcəm.

- Bütün başverənlərdən sonra Ayxan bəylə əlaqə saxladınmı, bu qərarın səbəbini soruşdunmu?
- İstefa haqqında heç bir məlumatım yoxdu. Ondan sonra da danışığımız olmayıb.

- Ayxan Abbasovun gedişi komandanızda nəyi dəyişəcək? Onun fəaliyyətini, nəticələrini necə dəyərləndirərdin?   
- Ayxan müəllimlə iki il idi bərabər işləyirdik. Böyük işlər görmüşdü. Komandanı sıfırdan yığıb, formalaşdırmışdı. Əziyyəti həqiqətən də danılmazdı. Çünki 1-ci il klubda vəziyyətin necə olduğunu hər kəs bilir. Ayxan müəllimlə birlikdə çox gözəl iki il keçirmişik. Ona gələcək karyerasında uğurlar arzulayıram.

- Başqa bir iddialara görə, baş məşqçinin gedişini istəməylər klubdan ayrılacaq. Amma sən daxil bir neçə futbolçu yeni müqavilə imzaladı...
-   İstər legionerlər, istərsə də yerli futbolçuların hər biri pis olmuşdu. Futbol həyatıdı və belə şeylər normaldı. Baş məşqçi, oyunçular hər dəfə başqa komandalarda ola bilir. Hər kəs qərarı özü verir. Mən də yeni müqavilə imzaladım. İnşallah, gələn mövsüm üçün əlimdən gələnin ən yaxşısını edəcəm ki, komandama xeyrim dəysin.

-  “Turan Tovuz”  avrokuboklara vəsiqə qazanaaydı, Avropada nəticə qazanacaq bir komamdadımı? Heyətinizi yaxşı olduğunu düşünürsən? 
- Məncə,“Turan Tovuz” gündən-günən daha yaxşı formalaşırdı. Həm yeni gələn, həm də ötən mövsümdən qalan futbolçular kluba daha çox uyğunlaşırdı. İldən-ilə daha da yaxşılaşacağıq. Düzdü, bu il Avropaya gedə bilmədik, ancaq qarşımıza belə bir məqsəd də qoyulmamışdı. Getmək şansımız yüksək idi. Getdiyimiz halda heyət baxımından dəyişiklik olacaq və daha da güclənəcəkdik.

- Həmçinin klubda maliyyə problemlərinin olduğu, hətta bəzi legionerlərin göndəriləcəyi deyilirdi...   
- Nə yalan deyim, maliyyə problemi yaşamamışıq. Maaşlarımızı həmişə vaxtında veriblər. Şükürlər olsun ki, belə bir problem yaşamamışıq.

- “Turan Tovuz”un növbəti mövsüm üçün hədəfləri nədi?
- “Turan Tovuz” çoxdan premyer-liqada oynamırdı. Son iki ildə qayıdıb. Hər şey pillə-pillə getməlidi. Sabiq baş məşqçimiz Ayxan Abbasov da bunun üçün çalışırdı. İnşallah, növbəti mövsüm daha yaxşı çıxış edərik.

RÖYANƏ OĞUZ