“Çelsi”də baş məşqçi problemi yoluna qoyulub.

“Football-plus.az” xəbər verir ki, gözlənildiyi kimi, paytaxt komandasını növbəti mövsümdən Entso Mareska çalışdıracaq.

Bu xəbəri ilk dəfə Fabritsio Romano yaymışdı. Tanınmış insayderin sosial şəbəkə hesabı vasitəsilə verdiyi xəbərdə tərəflərin müddəti “5+1 il”liyə nəzərdə tutulan müqavilə imzalayacaqları da qeyd edilmişdi. Bu məlumat doğru çıxıb. Mareskanın təyinatı bazar ertəsi rəsmən açıqlanıb.
İtaliyalı 2023-cü ildən çalışdırdığı “Lester”i son mövsümdə premyer-liqaya çıxarıb. O, yeni komandasında istefaya göndərilən Maurisio Poçettinonun yerini tutub. “Çelsi” rəhbərliyi son günlər 44 yaşlı Mareskanın təzminatıyla bağlı “Lester”lə də danışıqlar aparırdı. Hələ ki İngiltərə klublarının hansı məbləğə razılaşmasına aydınlıq gətirilməyib.