Müdafiəçi Adil Nağıyevin “Səbail”dən ayrıldığını xəbər vermişdik.

Xatırladaq ki, o, 2019-cu ilin yayından "dənizçilər”in formasını geyirdi. 28 yaşlı mərkəz müdafiəçisi son mövsümdə komandanın heyətində meydana çıxdığı 20 matçda bir məhsuldar ötürməsi ilə yadda qalıb. Bu ayrılıqla bağlı sabiq kapitanla danışdıq.

- Adil, komandadan ayrılmağının səbəbi nədi?
- Qarşılıqlı razılıq əsasında komanda ilə yollarımı ayırmışam. “Səbail”dən ayrılmağım həm mənim, həm də komanda üçün daha yaxşı olar.

- Bundan sonra karyeranı elitada davam etdirəcəksən? Konkret təkliflər varmı?
- Bu haqqda dəqiq nəsə deyə bilmirəm. Realllaşandan sonra açıqlanacaq. Menecerimin danışıq apardığı klublar var. Söhbət dəqiqləşdikdən sonra bilinəcək.

- Ümumiyyətlə, “Səbail” üçün son mövsümü necə qiymətləndirirsən? Doğrudanmı, komandanın real potensialı 7-ci yeri tutmağa imkan verirdi?
- Oyun baxımından 7-ci yerə layiq deyildik. “Səbail” qışdan sonra 2-ci yerdə gedirdi. Sadəcə, komandada sabitlik çatmırdı. Heyət yenidən qurulmuşdu. Başqa-başqa ölkələrdən gələn futbolçular burda ilk növbədə uyğunlaşmalıdı. Son 4, 5 tura qədər avrokuboklarda mübarizə aparmaq iddiasını qoruyurduq. Qeyri-sabitlik, fərdi səhvlər və hakim qərarları komandaya təsir etdi. Bu pillədə qərarlaşmaq komanda üçün uğursuzluq deyil. Çünki “Səbail” son illərdə yalnız sonuncu yerlərdə qərarlaşırdı. Futbolçularımıza bir müddət lazımdı ki, uyğunlaşma bitsin. Komandanın potensialı turnir cədvəlində daha yuxarılarda qərarlaşmaqdı. “Qarabağ” kimi komandanı məğlub etmişdik. Sonuncu oyunlarda diqqətsizliklər və adi səhlər komandaya çox təsir göstərdi.

- Uzun müddət avrokuboklara iddialılar sırasında olduz. Sonra isə qəfil eniş yaşandı. Bu enişin səbəbi nə idi?
- Fiziki cəhətdən rəqiblərimizdən daha üstün idik. Bütün oyunlarda da bunu görmək mümkündü. Sadəcə, ani diqqətsizliklər və hakimin qərarları üst-üstə yığılaraq, xal itirməyimizə səbəb oldu. Belə olan halda, rəqiblərimiz turnir cədvəlində yuxarı qalxmağa başladı, biz isə aşağı sıralara düşdük.

- Bəlkə qış fasiləsində yaxşı toplanış keçmədiz?
- Qış fasiləsinə gedəndə komanda 2-ci pillədə qərarlaşmışdı. Əsas oyunçularımız zədələndi və bu da komandaya təsir göstərdi. Qışdan sonra onların yerinə gələnlər də pis futbolçu deyildi. Sadəcə, onlar üçün uyğunlaşmaq çətin idi. Bizim meydança sintetikdi, gələn legionerlər oynaya bilmirlər. Əsas oyunçularımızın da zədələnməsi komandaya mənfi təsir göstərdi. Bütün bu məqamlar qışdan sonrakı nəticələrə təsir etdi.
Yeri gəlmişkən, Adilin yeni klubu müəyyənləşib. Mərkəz müdafiəçisi karyerasını “Şamaxı”da davam etdirəcək. “Şirlər” tezliklə bu bu transferi ictimaiyyətə açıqlayacaq. Xatırladaq ki, Adil 2022/23 mövsümündə icarə əsasında “Şamaxı”nın formasını geyib.

ƏSƏD SEYİDOV