"Bu komandalar arasında keçirilən görüşlərə diqqət yetirsək görərik ki, bütün oyunlar çətin mübarizə şəraitində keçib. "Qarabağ"ın uğur qazanması, maksimum səmərəliliyi ilə oldu. Paytaxt komandası da uğurlu görüşlər keçirib. Bu gün bizi çox maraqlı oyun gözləyir. Bunun üçün bir çox amillər də var.

Ondan başlayaq ki, bu gün premyer-liqada tonu və irəliləyişi təyin edən iki azerbaycanlı məşqçinin qarşıdurmasıdı. Onlar bir-birinin işini çox yaxşı bilir. Haradasa oxşar oyun tərzləri var. Hər ikisi bu oyunda sürpriz etmək istəyəcək. "Qarabağ"ın üstünlüyü var, lakin o qədər də böyük deyil. Onları aşkar favorit hesab etmək olmaz. Qarşılaşmada bol intriqa olacaq. "Zirə" tarixində ilk titulu qazanmaq, "Qarabağ" isə bu mövsümdə qızıl dubl etmək istəyir. Buna görə də hər iki komanda öz ən yaxşı keyfiyyətlərini ortaya qoymağla uğur qazanmağa çalışır. "Zirə" etibarlı oyunu, "Qarabağ" isə öz oyun tərziylə bunu etməyi planlaşdırır. Düşünürəm ki, oyun sona qədər taktiki və strateji planlarda, mübarizə şəraitində keçəcək. Qoy güclü və layiq olan qələbə qazansın. Hər iki komandaya uğurlar arzulayaq".

"Təbii ki, finalın favoriti "Qarabağ"dı. Bu da elə-belə deyil. Komandalar arasında keçən oyunların nəticələrinə nəzər yetirsək görərik ki, "Qarabağ"ın aşkar şəkildə üstünlüyü var. Bütün bunlar onu göstərir ki, "köhlən atlar" qələbəyə bir addım daha yaxındı. Üstəlik heyət, oyun baxımından daha öndədilər. Amma final matçının ab-havası çox fərqli olur. Bəzən kuboku favorit sayılmayan komandalar qazanır. Bunun dəfələrlə şahidi olmuşuq. 2 il öncə də bu komandalar Qəbələdə kubokun finalında qarşılaşmışdı. O zaman qalibin adına oyun sonrası penaltilərdə aydınlıq gəlmişdi. Bu dəfə də elə olacağı istisna edilmir. Belə oyunlarda nəticəni öncədən proqnozlaşdırmaq çətindi. Yekun olaraq 60 faiz "Qarabağ"ın qalib gələcəyini deyə bilərəm".

"Böyük əksəriyyətdən soruşsaq hər kəs eyni cavabı verər. "Qarabağ" hazırda təkcə "Zirə" deyil, digər istənilən klublarımızla müqayisədə açıq ara favoritdi. Amma kubok oyunları fərqli olur. "Zirə" də oyun intizamı, komanda olaraq müdafiə mənasında möhkəm komandalarımızdandı. Onlar arasında olan son çempionat oyununda da göründü ki, sadəcə 1 penalti qolu ilə məğlub oldular. Ona görə də oyunun atmosferi, mahiyyətini, önəmini bütün "Zirə" futbolçuları da bilir. Kubok qazanmaq başqa hissdi. Kağız üzərində favorit "Qarabağ" hesab olunur. Amma istənilən komanda 1 matça çıxıb, toparlanıb oynaya bilir. "Zirə" futbolçuları tapşırıqları yerinə yetirib, intizamı sonuna qədər qoruya bilsələr qalib gələ və ya oyunu penaltilər seriyasına qədər apara bilərlər".