“Araz-Naxçıvan” Misli premyer-liqasının son turunda “Qarabağ”la oyunda heç-heçə etməklə mövsümü 8-ci pillədə bitirdi.

Muxtar Respublika təmsilçisinin mövsümün ikinci yarısını uğurlu keçirmədiyini bilirik. Axı komanda 18-ci turdan sonra cəmi iki qələbə qazana bilib. Təbii ki, bu, Azər Bağırovla Elmar Baxşıyevin ortaq “əl işi”di. Lakin elitada mövsümün sona çatdığını nəzərə alsaq, bir çox cəhətdən keçmişi sorğulamaq yersizdi. Əsas məsələ “qırmızı-ağlar”ın növbəti “futbol ili” üçün planlarının hansı yöndə olmasıdı. Dünən səhər saatlarında məhz bu mövzuda götür-qoy edirdim ki, klub rəsmi saytı bir neçə məqama aydınlıq gətirən xəbər yaydı. Aydın oldu ki, “Araz-Naxçıvan” daha bir il Elmar Baxşıyevin rəhbərliyi altında meydana çıxacaq. Düzü, komanda təcrübəli mütəxəssisin dövründə 7 oyunda 5 məğlubiyyət, 1 heç-heçə, 1 qələbəyə imza atdığından bu ehtimalı yüksək dəyərləndirmirdim. Belə düşünməyimin səbəblərindən biri də “qırmızı-ağlar”ın 7 matçdan beşində qol vura bilməməsiydi. Bunu kollektivin “Qəbələ”nin sabiq futbolçuları Urfan Abbasov, Ülvi İsgəndərov və “Neftçi”nin yetirməsi Ömər Buludov ilə bir il müddətinə müqavilə imzaladıqları haqda xəbərlər müşayiət etdi. Hər halda, klub rəhbərliyi ilə baş məşqçinin hansı şərt və tələblər əsasında anlaşdığını bilmədiyimdən məsələylə bağlı tək baş sındırmağın mənasız olduğunu anladım. Belədə Elmar bəylə əlaqə saxlamaq, hədəflər və planlar haqda söhbətləşmək lazım gəldi.

– Rəhbərlik əvvəldən uzunmüddətli müqavilə imzalamaq niyyətindəydi. Lakin mən tələsmək istəmədim. Bildirdim ki, öncə komandanı tanımaq, ümumi durumdan agah olmaq lazımdı. Geridə qalan iki ay ərzində müəyyən məsələləri təhlil etdim. Rəhbərliklə görüş zamanı vacib nüansları müzakirə etdik və yekunda razılığa gəldik.

– Qarşıdan gələn “futbol ili” üçün sizdən hansı nəticə tələb olunur?
– Birincisi, yeni komanda formalaşdırmalıyıq. İndidən pafosla danışmaq, “çempion olacağıq” demək düzgün deyil. İlk növbədə rəqabətədavamlı komanda yaratmalıyıq. Qısası, kollektiv komplektləşəndən sonra hansısa hədəfdən, ideyadan danışa bilərik. Hələ ki bu suala dəqiq cavab verə bilmərəm.

– Heyətdə gözlənilən dəyişikliklərlə bağlı konkret fikirlər varmı? Hansısa dəyişiklik gözlənilir?
– Bilindiyi kimi, artıq üç futbolçuyla anlaşmışıq. Hazırda həm yerli, həm də xarici bazarda axtarışlarımız davam edir. Daha da güclənmək istəyirik. Burda olduğum müddətdə söz sahibi mənəm. Rəhbərlik bu barədə əlindən gələnin ən yaxşısını etməyə çalışır ki, istədiyim kollektivi araya-ərsəyə gətirək. Ciddi dəyişiklik etməyi planlaşdırmırıq. Sadəcə, bəzi mövqelər var ki, daha da güclənməlidi. Bu yöndə müzakirələr gedir. Artıq ötənilki futbolçuların bəziləriylə müqavilə bağlanılıb. Bir neçəsinə də təkliflərimizi çatdırmışıq. Onlardan cavab gözləyirik. Oyunçu məsələylə bağlı son qərarını söylədikdən sonra işimizi daha düzgün qura biləcəyik. Bizə sistemə uyğun oyunçular lazımdı. Belə olsa, məmnuniyyətlə həmin futbolçuyla danışıqlara başlayacağıq. Ümumiyyətlə, yola bəyəndiklərimlə davam edəcəyik.

– “Araz-Naxçıvan” stadionla bağlı məlum problemə görə ev oyunlarını Bakıda keçirir. Həmçinin “qırmızı-ağlar” geridə qalan mövsümün ən az azarkeş toplayan (orta hesabla hər ev oyununu 577 azarkeş izləyib – red.) komandası oldu. Bu məqam sizi nə dərəcədə narahat edir?
– Bəli, bölgə təmsilçisiyik. Naxçıvanda oynasaq, təbii ki, həm azarkeş dəstəyi artar, həm də daha yaxşı nəticələr qazana bilərik. Bu, sözsüz, bizə faydalı olacaq. Rəhbərliklə ilk söhbətdə mənə deyilib ki, gələcəkdə ev oyunlarımızı Naxçıvanda keçirəcəyik.

KƏNAN BAHADIR