28 sarı, 5 qırmızı vərəqənin qeydə alındığı, “Neftçi” - “Sabah” oyununda hadisələrin nəzarət çıxdığı turda hakimlərin ünvanına kompliment söyləmək çətindi.

Gözlənildiyi kimi, bu dəfə də idarəçilikdən narazı qalan baş məşqçilər var idi. “Sabah”ın çalışdırıcısı Krunoslav Renduliç oyuna 9 dəqiqə əlavə edən ölkənin ən yaxşı hakimi Əliyar Ağayevdən narazılığını “bəzən görəsən, niyə 10-11 dəqiqə əlavə etmir” deyə düşünürəm” sözləriylə ifadə etdisə, Şahin Diniyev İnqilab Məmmədovun ilk 11 dəqiqədə iki sarı vərəqə göstərməsini “Səabil”in oyunçularının gözünü qorxutmaq niyyəti ilə izah etdi.

Neftçi – Sabah, ƏLİYAR AĞAYEV
Mövsümün həlledici matçı ölkənin ən təcrübəli hakiminə tapşırılmışdı. Əcnəbi VAR hakiminin varlığı da Ağayevin məsuliyyətini artırırdı. Xoşbəxtlikdən referu oyunun ümumi atmosferinə xələl gətirməyən, operativ qərarlarla yadda qala bildi. Yeganə çatışmazlıq kimi cüzi kobudluqların belə qısa fasilələrə səbəb olduğunu qeyd edə bilərik. Halbuki gərginlik və həyəcan nəzərə alınmalıydı. 89-cu dəqiqədən sonra meydanda yaranan xaosa görə referi də məsuliyyət daşıyır. Qısa zaman kəsiyində meydana üç, meydandan kənarda daha bir futbolçu, eləcə də Bojoviç qırmızı vərəqə ilə cəzalanırsa, deməli, Əliyar bəy potensial təhlükəni vaxtında görməyib.

Turan Tovuz – Kəpəz, RƏŞAD ƏHMƏDOV
Qərb derbisində ənənəvi ciddi rəqabətə şahidlik etdik. “Turan Tovuz”un üstünlüyü şəraitində keçən matçda ciddi qayda pozuntularına yol verilmədi. Gərginliyin səbəb olduğu intizamsızlıqlar gözlənilən idi ki, referi qənaətbəxş təsir bağışladı. Əlbəttə, İsmayıl Zülfüqarlının cərimə meydançası daixilində Nemət Musayevin ayağını tapdalamasını VAR-ın “gözləriylə” yox, özü görsəydi, daha yaxşı olardı. Hər halda, penalti və vərəqə cəzaları heç kimdə narazılıq doğurmadı.

Zirə - Səbail, İNQİLAB MƏMMƏDOV
“Zirə” üçün mühüm əhəmiyyət daşıyan və Avropa qapılarını açan bu görüşün idarəçiliyi təcrübəli FİFA referisi İnqilab Məmmədova həvalə olunmuşdu. İlk dəqiqələrdən etibarən tərəflərin aqressiv mübarizəsi Məmmədovu final fitindən cəmi 5 dəqiqə sonra əlini cibinə atmağa məcbur etdi. Qarşılaşmadakı gərginlik protokola 10 sarı və 1 qırmızı vərəqənin yazılmasıyla nəticələndi. Oyunsonrası mətbuat konfransında Şahin Diniyev aqressiv mübarizəni vərəqəsiz də idarə etməyin mümkün olduğunu dedi. Bəlkə də mütəxəssis bu fikrində bir qədər haqlıdı. Ümumilikdə Məmmədovun hər hansı ziddiyyətli qərarı görünmədi. Doğrudu, bəlkə də Valdemar Almeydaya qırmızı vərəqə göstərdiyi epizodda güzəşt etmək olardı.

Araz-Naxçıvan – Qarabağ, ƏKBƏR ƏHMƏDOV
Cari mövsümün sonuncu qarşılaşması birinci dərəcəli hakim Əkbər Əhmədova həvalə olundu. Ədalət təmsilçisi ilk dəfə premyer-liqa matçı idarə etməsinə rəğmən, işinin öhdəsindən gəldi. Digər tərəfdən, “Qarabağ”ın oyunlarında hakimliklə bağlı elə də qaranlıq məqamlar olmur. “Araz-Naxçıvan” düşərgəsi mövsümün əvvəlindən bəri hakimlər tərəfindən dəfələrlə xaldan məhrum olduğunu bildirib. Ancaq bu görüşü həmin siyahıya aid etmək olmaz. Oyundakı penalti epizoduna gəlincə, VAR-a baxandan sonra verilən qərar doğru idi. Çünki teleyayında göründüyü kimi, Mateus Silvanın ayağına aşkar toxunuş var idi.

Sumqayıt - Qəbələ, TURAL QURBANOV
Bu oyuna hədsiz böyük maraq var idi. Meydan sahiblərinin qələbədən başqa hədəfi yox idisə, elitadan gedişi rəsmiləşəndən sonra ardıcıl üç qələbə qazanan qonaqlar da xal üçün döyüşəcəkdi. Oyun yetərincə sürətli və gərgin mübarizə şəraitində keçdi. Tural Qurbanovun başçılıq etdiyi hakimlər briqadasının nəticəyə təsir edən ciddi səhvi olmadı. Referi futbolçulara 6 sarı vərəqə göstərdi ki, bunların hamısı haqlı idi.