Basketbol üzrə Avroliqanın Berlində keçirilən “4-lər finalı” başa çatdı.

Qəzetimizin ötən sayında yarımfinal oyunlarının nəticəsi ilə tanış olmuşduz. Yunanıstanın iki klubu – “Panatinaikos”la “Olimpiakos” iştirakçılar arasında olduğundan azarkeşlərlə bağlı hansısa insidentlərin yaşanması gözlənilən idi. “Fənərbaxça” ilə “Panatinaikos” arasındakı yarımfinal oyunu məhz azarkeşlər arasındakı dava-dalaş üzündən 25 dəqiqə gec başlamışdı. Azarkeşlərin bir qrupu arenaya hətta biletsiz daxil olmağa çalışmışdı. Bazar günü daha böyük qalmaqal yaşandı. Bu dəfə Yunanıstan klublarının fanatları toqquşdu. Nəticədə 12 adam xəstəxanalıq oldu. “Eurohoops”un yaydığı xəbərə görə, polis bu qalmaqala görə bir neçə şəxsə saxlayıb. Xəstəxanaya düşənlərdən birinin vəziyyəti çox ağırdı, ikisi isə ciddi zədə alıb.
Parket üzərində yaşananlara gəlincə, “Fənərbaxça” 3-cü yer uğrunda oyunda da məğlubiyyətlə barışdı. Finalda isə indiyə qədər bu turniri 11 dəfə qazanan “Real”la məşhur türkiyəli məşqçi Ərgin Atamanın çalışdırdığı “Panatinaikos” üz-üzə gəldi. Afina klubu Madrid nəhənginin titulu qorumasına imkan vermədi. Çempionların heyətində oyun qurucusu Kostas Slukas seçildi. O, 24 xal topladı, 2 ribaund etdi və 3 məhsuldar ötürmə verdi. Beləliklə, 2011-ci ildən bəri ilk dəfə Avroliqanın qalibi olan “Panatinaikos” son çempionu devirdi.

Slukas “4-lər finalı”nın ən dəyərli oyunçusu sayıldı. O, Avroliqa tarixinə bu turniri dörd dəfə qazanan 3-cü basketbolçu kimi düşdü. Əvvəllər bunu yalnız Kayl Hayns ilə Şarunas Yasikyaviçus bacarıb. Slukas həmçinin üç fərqli komandanı heyətində Avroliqanın qalibi olan 2-ci basketbolçudu (birinci Yasikyaviçusdu). Kostas 2012, 2013-cü illərdə “Olimpiakos”un, 2017-ci ildə isə “Fənərbaxça”nın heyətində bu titulu qazanıb.

Əlbəttə, Slukasla yanaşı, Ərgin Ataman da bu qələbənin memarıdı. “Panatinakos”un türkiyəli çalışdırıcısı son dörd mövsümdə 3-cü dəfə bu titulu qazandı. O, 2021, 2022-ci illərdə həmvətənlərini – “Efes”i titula daşımışdısa, bazar günü də yunanları sevindirdi. Ataman məşqçi kimi 2016-cı ildə Avrokuboku da qazanıb, 5 dəfə (2009, 2013, 2019, 2021, 2023) Türkiyə çempionu olub, 2021-ci ildə Avroliqada ilin məşqçisi sayılıb.

Sonuncu finalla bağlı daha bir maraqlı məqam var. İş ondadı ki, “Panatinaikos” heç vaxt Avroliqanın finalına uduzmayıb! Ümumiyyətlə, Afina təmsilçisi Avroliqanın indiki “4-lər finalı” formatı yaranandan bəri bu titulu 7 dəfə (1996, 2000, 2002, 2007, 2009, 2011, 2024) qazanan yeganə klubdu. Heç bir başqa komanda bu müddətdə Avroliqanı 4 dəfədən artıq qazanmayıb. “Panatinaikos” bu müddətdə ümumilikdə 12 dəfə (1994, 1995, 1996, 2000, 2001, 2002, 2005, 2007, 2009, 2011, 2012, 2024) Avroliqanın “4-lər finalına” vəsiqə qazanıb, amma heç vaxt finalda məğlub olmayıb.

Berlində keçirilən turnirin oyunlarını izləyənlər arasında MBA əfsanələri də var idi. “Çikaqo” ilə 6 dəfə MBA çempionluğunu qazanan Skotti Pippen tribunalarda yaşanan ab-havanı çox bəyənib:

“Miluoki”nin yunan forvardı Yannis Adetokunbo da azarkeşlər arasında olub. Pippen “Panatinaikos”la “Fənərbaxça” arasındakı oyundan əvvəl azarkeşlər önündə məşq edib.

3-cü yer uğrunda oyun
Olimpiakos (Yunanıstan) – Fənərbaxça (Türkiyə) 87:84 (24:16, 24:21, 18:25, 21:22)
final
Real (İspaniya) - Panatinaikos (Yunanıstan) 80:95 (36:25, 18:24, 7:15, 19:31)