Srağagün və dünən basketbol üzrə Avroliqada müntəzəm çempionatın 10-cu turunun oyunları keçirilib.

“Football-plus.az” xəbər verir ki, Türkiyə klubları bu dəfə fərqli nəticələrlə yadda qalıb. Xüsusən də “Fənərbaxça”nın çıxışına izah tapmaq çətindi. Bir müddət əvvəl qələbələri sıralayan “sarı-lacivərdlilər” indi də məğlubiyyət seriyasını davam etdirir. Türkiyə nəhəngi hesabat turunda səfərdə “Virtus”a uduzmaqla ardıcıl 4-cü məğlubiyyətlə barışdı. “Fənər”in baş məşqçisi Dimitris İtudis bu oyunda iki texniki folla meydandan qovuldu. İnsident 3-cü çeyrəyin sonuna 6:05 qalmış, hesab “Virtus”un xeyrinə 55:46 olarkən baş verdi. Tornike Şengeliya Naycel Heys-Devisi itələyərək asanlıqla 2 xal qazandı. İtudis hücum folu qeydə alınmasını tələb etsə də, hakimlər susdu. Fitin səslənməməsi ilə barışmayan yunan məşqçi yan xəttə boyunca irəli-geri qaçmağa başladı və nəticədə hakimlərdən biri Xuan Karlos Qarsiya ilə toqquşdu.

“Efes” isə “Partizan”ı qəbul etdi və qalib gəldi. Yeri gəlmişkən, “pivəçilər”in əsas ulduzu Şeyn Larkin əl barmağını zədələyib. Türkiyə çempionatında son oyunu buraxan amerikalı ulduzun cərrahi müdaxiləyə ehtiyac duyması gözlənilir. Komandanın baş məşqçisi Ərdəm Canın dediyinə görə, Larkin ciddi zədə ilə üzləşən yeganə basketbolçu deyil: “Qrafikimiz çox çətindi. İki səfər oyunu keçirdik. Komanda zədə üzündən üç oyunçu itirdi. Şeyn Larkin, Elayca Brayant və Tibor Plyayss ciddi zədə alıb. Plyayss bir neçə gün əvvəl Avroliqada keçirilən “Monako” ilə oyunda zədələndi. Brayant isə pəncəsi ilə bağlı problem üzündən artıq bir neçə həftəni buraxıb”.
Avroliqada mübarizə aparan komandalardan “Panatinaikos”la bağlı da yenilik var. Bu klub Yunanıstanın nəhəng inşaat şirkəri “Aktor”la əməkdaşlıqla bağlı razılaşıb. Müqavilədə klubun adının dəyişməsi də nəzərdə tutulur. Yunanıstan nəhəngi bundan sonra “Panatinaikos Aktor” adalanacaq. Klub bir ildən artıq idi ki, titul sponsorundan məhrum idi. “Pao”nun əvvəllər ölkənin ORAR qumar şirkəti ilə əməkdaşlıq etdiyini də xatırladaq. ORAR hələ də klubun vacib sponsoru kimi qalır, ancaq şirkətin adı artıq komandanın adı ilə yanaşı göstərilməyəcək.

ASVEL (Fransa) – Bavariya (Almaniya) 100:101 2ОТ (18:22, 22:15, 20:14, 14:23, 14:14, 12:13)
Makkabi T-Ə (İsrail) – Barselona (İspaniya) 90:92 (31:26, 20:25, 17:19, 22:22)
Panatinaikos (Yunanıstan) – Valensiya (İspaniya) 90:73 (27:18, 22:17, 23:18, 18:20)
Virtus B (İtaliya) – Fənərbaxça (Türkiyə) 87:79 (25:27, 21:17, 24:14, 17:21)
Real (İspaniya) – Alba (Almaniya) 99:75 (27:17, 17:16, 23:18, 32:24)
Efes (Türkiyə) – Partizan (Serbiya) 100:94 (22:22, 28:23, 14:29, 36:20)
Olimpiakos (Yunanıstan) – Jalgiris (Litva) 89:72 (19:19, 24:12, 26:21, 20:20)
Baskoniya (İspaniya) – Monako (Fransa) 75:77 (19:16, 17:19, 23:27, 16:15)
Srvena Zvezda (Serbiya) – Milan (İtaliya) 71:93 (19:20, 20:18, 17:25, 15:30)
Xal durumu: Real, Barselona – 18, Virtus B – 17, Panatinaikos, Olimpiakos, Monako – 16, Baskoniya, Fənərbaxça, Valensiya, Efes – 15, Makkabi, Milan, Partizan, Jalgiris, Bavariya – 14, Srvena Zvezda – 13, ASVEL – 12, Alba – 11.