Çərşənbə günü və cümə axşamı Konfrans Liqasının (KL) cavab yarımfinal oyunları keçirildi.

“Football-plus.az” xəbər verir ki, ilk matçlarda sərfəli nəticələr əldə edən komandalar finala adladılar. Beləliklə, mayın 29-da Yunanıstanın Afina şəhərində keçiriləcək həlledici matçda “Fiorentina” ilə “Olimpiakos” qarşılaşacaq.

yarımfinal, cavab oyunları
Brügge - Fiorentina 1:1 (ilk oyun - 2:3)
Vanaken, 20 – Beltran, 85-p.
Brügge (Belçika): Minyole, Sabbe, Mexele, Ordonyes, De Kuyper, Odoi (Nusa, 86), Vanaken, Vetlesen (Sinkernaqel, 70), Skuras (Nilsen, 86), Tyaqo, Xutqla.
Fiorentina (İtaliya): Terraçano, Dodo, Martines, Milenkoviç, Biraqi, Mandraqora, Artur (Dunkan, 71), Kuame, N.Qonsales, Belotti (Nzola, 70), Beltran (Ranyeri, 90).

KL-in ötən mövsümünün finalçısı olan “Fiorentina” ardıcıl ikinci dəfə həlledici oyunda iştirak şansına malikdi. İtaliya klubu “Brügge” ilə ev oyununda çətinliklə olsa da, son dəqiqələrdə Nzolanın vurduğu qolla 3:2 hesabıyla qalib gəlmişdi. Son 32 ildə ilk dəfə avrokubokların yarımfinalına çıxan Belçika klubu hazırda Niki Hayenin başçılığı altında ölkə çempionluğu uğrunda mübarizəni davam etdirir. “Fiorentina” isə bütün diqqətini KL-ə yönəldib.

Bütün turnirlərdə keçirdiyi son 9 matçda 8 qələbə qazanan brüggelilər cavab oyunu ərzində topa bir qədər çox – 52 faiz nəzarət etsələr də, florensiyalılar digər statistik göstəricilərdə ev sahiblərini üstələdilər. Bircə faktı qeyd edək ki, Vinçentso İtalyanonun çalışdırdığı komanda qapıya zərbələr planında rəqibini 20:4 hesabıyla arxada qoydu. Amma hər iki komanda qapıya yalnız 2 dəqiq zərbə endirə bildi. Qapıçıların hərəyə bir dəfə seyv etməsi isə 1:1 hesabını qaçılmaz etdi. Brüggelilər 20-ci dəqiqədə Vanakenin zərbəsi ilə hesabı açandan sonra uzun müddət qalib durumunda oldular. Vaxt ötdükcə hücumları artıran qonaqlar istəyinə son dəqiqələrdə çatdılar. Kifayət qədər sərt və kobud axarda (türkiyəli hakim Xəlil Meler ümumilikdə 9 oyunçuya sarı, son dəqiqələrdə isə ev sahiblərinin oyunçusu Odoiyə qırmızı vərəqə göstərdi) keçən matçda Beltranın penalti ilə vurduğu qol “Fiorentina”nı ardıcıl ikinci dəfə finala çıxardı. Xatırladaq ki, İtalyanonun komandası bir il əvvəlki finalda “Vest Hem”ə 1:2 hesabıyla məğlub olmuşdu.

Olimpiakos - Aston Villa 2:0 (4:2)
Əl-Kaabi, 10; 79.
Olimpiakos (Yunanıstan): Tsolakis, Rodiney, Retsos, Karmu, Kini (Apostolopulos, 77), İborra (Andre Orta, 73), Fortunis, Podense (Masuras, 64), Şikinyo, Esse, Əl-Kaabi.
Aston Villa (İngiltərə): Martines, Keş (Kizler-Heyden, 86), Dieqo Karlos (Ayroqbunam, 65), Konsa, Torres, Din (Manro, 86), Beyli (Kellimen, 86), Makqinn, Duqlas Luis, Diabi (Duran, 58), Uotkins.

Hazırda İngiltərə premyer-liqasında 4-cü yerdə möhkəmlənən “Aston Villa”nın mayın 2-də öz meydanında “Olimpiakos”a 2:4 hesablı məğlubiyyəti çox gözlənilməz nəticə olmuşdu. İspaniyalı mütəxəssislərin ilk duelindən Xose Luis Mendilibar qalib çıxmışdı. Birmingemlilərin doğma “Villa Park”dakı uğursuzluğun əvəzini Pireydə çıxmaq ehtimalı az idi. Unay Emeri komandasının finala adlamaq üçün əlindən gələni edəcəyini bildirməklə yanaşı, bu vəzifənin reallaşmasının çox çətinləşdiyini də etiraf etmişdi.

Tarixində ilk dəfə qitə kuboklarının yarımfinalında oynayan “Olimpiakos” heç də zəif sayılmayan rəqibini Yunanıstanda da məğlub etdi. İlk dəqiqələr qonaqların üstünlüyü şəraitində keçsə də, hesabı ev sahibləri açdılar. İngiltərədə het-trik etməklə birmingemliləri şoka salan Əl-Kaabi 10-cu dəqiqədə Kininin ötürməsi ilə Martinesin qoruduğu qapıya yol tapdı. Qonaqlar qapısında erkən qol görməsinə baxmayaraq, ruhdan düşmədi və hücumları davam etdirdilər. Lakin “Aston Villa”nın oyunçuları hücumları məntiqi sonluğa çatdırmaqda çətinlik çəkirdilər. Mendilibarın komandası arxa xətdə sayıq oynamaqla yanaşı, əks-hücumlarda növbəti qolu vurmağa çalışırdı. Belə taktika 79-cu dəqiqədə də bəhrə verdi: Əl-Kaabi bu dəfə də qapıya yol tapdı. Bununla da “Olimpiakos”un tarixində ilk dəfə qitə kuboklarının finalına çıxması rəsmiləşdi. Xatırladaq ki, avrokuboklarda indiyədək finalda oynayan yeganə Yunanıstan komandası Çempionlar Kubokunun 1970/71 mövsümünün son oyununda “Ayaks”a uduzan (0:2) “Panatinaikos” olub. İngiltərə isə 2020-ci ildən sonra ilk dəfə qitə arenasında finalda təmsil olunmayacaq.

Bir il əvvəl “Sevilya”nı Avropa Liqasında qələbəyə daşıyan Mendilibar ardıcıl ikinci dəfə avrokubokda qalib gəlmək şansına malikdi. “Aston Villa”ya iki oyunda 5 qol vuran Əl-Kaabi “Olimpiakos”un tarixinə bir avrokubok mövsümündə 12 qol vuran ilk futbolçu kimi düşdü. 30 yaşlı mərakeşli hücumçu KL-in cari mövsümünün əsas mərhələsində 10 qolla bombardirlərin yarışına başçılıq edir. Maraq üçün Ayubun bu mövsüm bütün turnirlərdə meydana çıxdığı 46 oyunda 32 qol vurduğunu da bildirək.

Bombardirlər: Əl-Kaabi (Olimpiakos) - 10, Zahavi (Makkabi T-Ə) - 8, Petkoviç (Dinamo) - 7.

Oyundan sonra
Unay Emeri, “Aston Villa”nın baş məşqçisi: