Misli premyer-liqasının cari mövsümünün son matçında “Araz-Naxçıvan”la “Qarabağ” qarşılaşdı. Ağdam təmsilçisinin 11-ci çempionluğunu qeyd edəcəyi oyun “Azərsun Arena”ya təyin edilmişdi. Oyunun nəticə baxımından heç bir önəmi qalmasa da, həm “Qarabağ”, həm də “Araz-Naxçıvan” mövsümü qələbə ilə bitirmək istəyirdi.

Artıq 3-cü dəqiqədə Lunyovun uşaqcasına kobud səhvindən sonra Maşike komandasını önə çıxardı – 1:0. Ağdamlılar erkən qola rəğmən, meydandakı dominantlığını itirmədi. 16-cı dəqiqədə Elvinin akrobatik zərbəsi qolkiper üçün heç bir çətinlik yaratmadı. Bir qədər sonra isə Elvin ev tapşırığını yerinə yetirərək topu yerlə Torala ötürdü. Lakin Bayramovun zərbəsi təhlükəli olmadı. 23-cü dəqiqədə Zubir Juninyo ilə qısa paslaşmadan sonra qapını hədəf aldı. Bu dəfə fə Avram diqqətli oynadı. “Qarabağ”ın futbolçuları bir neçə dəfə “çərçivə”yə düşsələr də, sanki zərbələri “yumşaq” qalırdı. 27-ci dəqiqədə onlar hesabı bərabərləşdirdi. Zubirin müdafiənin arxasına göndərdiyi baxımlı ötürməni çempionatın ən sərrarst futbolçusu Juninyo qolla tamamladı - 1:1. Qoldan sonra da topa nəzarəti itirməyən Qurbanovun yetirmələri 32-ci dəqiqədə önə keçdi. Mateusun qapı önündəki boşluğa göndərdiyi ötürmə zamanı Juninyonu qabaqlayan Vadim avtoqola imza atdı – 1:2. Naxçıvanlılar geridə olmaqla barışmır, uzun ötürmələrlə əks-hücuma çıxmağa çalışırdı. 38-ci dəqiqədə Maşike Bəhlulla ikili mübarizədən qalib ayrıldı, sağ cinahla irəliləyərək topu “çərçivə”yə göndərdi. Lakin bu zərbə Lunyov üçün heç də çətinlik yaratmadı. İkinci yarıya da qonaqlar daha fəal başladı. Rəqib müdafiəsini azlıqda görən “köhlən atlar” Juninyo ilə sağ cinahdan sürətli əks-hücuma çıxdı. Braziliyalı forvard xeyli məsafə qət etdikdən sonra topu diqqətdən yayınan Torala ötürdü. Ancaq Bayramov qapıçıyla təkbətək zamanı topu tora qovuşdura bilmədi. Fürsəti boşa verən çempion 59-ci dəqiqədə qapısında qol gördü. Avtoqol müəllifi olan Vadim müdafiənin arxasına baxımlı ara ötürməsi ilə Abdullanı təkbətək çıxardı. O isə Lunyovla dueldən qalib ayrıldı - 2:2. Mövsümü qələbə ilə başa vurmaq istəyən “köhlən atlar” 3-cü qol üçün irəli atıldı. 65-ci dəqiqədə Elvin növbəti dəfə iti bucaq altından “çərçivə”yə düşməyə çalışdı. Amma yenə də qolkiper buna mane oldu. Bir qədər sonra isə Zamiqin Silvaya qarşı kobudluğuna görə referi naxçıvanlıların qapısına penalti təyin etdi. Topa yaxınlaşan Diakabi real şansı dəyərləndirə bilmədi. Uzatma dəqiqələrində Medina topu sinəsiylə ram edərək sol ayaqla baxımlı zərbə vurdu. Lakin qapı çatı qola imkana vermədi. Ardından yan xətt hakiminin ofasyd bayrağı havaya qalxdı.

Beləliklə, çempionatın sonuncu matçı bərabərliklə yekunlaşdı. Muxtar Respublika təmsilçisi mövsümü 8-ci pillədə tamamladı.

Gözdən qaçmadı
* “Sektor 85” və “İmarət Tayfa” tribunada idi. “İmarət Tayfa” “Müşfiq Hüseynov” və “Əfsanəvi kapitan Maksim Medvedev” kimi şüarlar səsləndirdi.
* Mükafatlandırma zamanı Qurban Qurbanov görünmədi. Mərasimi AFFA prezidenti Rövşən Nəcəf, AFFA-nın icraçı vitse-prezidenti Sərxan Hacıyev və Peşəkar Futbol Liqasının prezidenti vəzifəsini müvəqqəti icra edən Elgiz Abbasov həyata keçirdi. Əvvəlcə “Azerlotoreya”nın İdarə Heyətinin Sədri Osman Karakuş təltif olundu. Daha sonra isə “Qarabağ” futbolçuları qızıl medallara layiq görüldü. Rövşən Nəcəf çempionluq kubokunu kapitan Maksim Medvedevə təqdim etdi. 20 qolla bombardir olan Olavio Juninyo da mükafat aldı.

KAMAL SƏFƏR