Dünən avrokuboklara qatılacaq komandaların adı bəlli oldu.

“Sabah” “Neftçi”ni mübarizədən kənarlaşdırmaqla Avropaya yolun açdı. Şənbə günü keçirilən matç bir neçə məqamla yadda qaldı. Masazır təmsilçisinin uğurunda ən böyük pay sahiblərindən biri də qapıçı Yusif İmanov oldu. Yaddaqalan seyvlər edən 21 yaşlı futbolçu oyundan sonra “Football-plus.az”ın suallarını cavabladı.

- Həlledici oyunda komandanın bu uğurunu necə şərh edərdin?
-Oyuna biz üstün başladıq. Sona qədər də elə davam etdik. Lazım olan qolu vurduq. Nəticədə hər şey istədiyimiz kimi yekunlaşdı.

- Meydanda "Neftçi”nin bəxti gətirmirdi, yoxsa siz daha güclü idiz?
- Biz onlardan güclü idik. Gücümüzü də lazım olan şəkildə göstərdik.

- Komandanizdan iki futbolçu “qırmızı” aldı. O zaman hesabın bərabərləşəcəyini düşünürdün?
- Sadəcə, qapıdan top buraxmamaq istəyirdim. Necə başladımsa, elə də davam etməyi düşünürdüm. Hesabın bərabərləşməsinə heç çür imkan verə bilməzdim.

- Rəqib oyunçular iki dəfə sənə qarşı kobud hərəkət etdi. Hiss edilirdi ki, səndən qisas almaq istəyirlər...
- Hə iki dəfə yıxıldım. Sonuncuda dizlə vurdular(90+6-cı dəqiqəni nəzərdə tutur - red.). Başımda hələ də şiş qalıb. Amma vərəqə verməilər, oyuna davam etdik. Aqressivliyi başa düşmək olar. Əsas odu ki, bunlar geridə qaldı. Ciddi problem yoxdu.

- Bu gün yaxşı seyvlərlə yadda qaldın. Mövsümün son oyununu yaxşı başa vurdun. Bəs mövsümü necə dəyərləndirərdin?
– Mənə görə bu mövsüm enişli-yoxuşlu keçdi. Əvvəl yaxşı getmirdi, amma şükür ki, sonlarını yaxşı gətirdim. Ümid edirəm ki, növbəti mövsüm daha da yaxşı olacaq.

- Avropada ötən illə müqayisədə daha yaxşı nəticə əldə edəcəyinizi düşünürsən?
- Bu il Avropada ötənilkindən daha yaxşı nəticə əldə edəcəyik. İldən-ilə təcrübəmiz artır. Komandamın bu mövsüm Avropada ölkəmizi layiqincə təmsil edəcəyinə inanıram.

- Ötən il avrokuboklara vəsiqəni Murad Musayevlə, bu il isə Kronoslav Renduliçlə qazandız. Onları necə müqayisə edərdin?
- Hər ikisi mənə şans verirdi. Onlara, sadəcə, təşəkkür edirəm. Hər ikisi yaxşı məşqçi, yaxşı insandı.

RÖYANƏ OĞUZ