“Qarabağ”ın müdafiəçisi Bəhlul Mustafazadə ölkə kubokunun 1/2 final mərhələsində keçirilən "Neftçi" - "Qarabağ" matçından (0:4) sonra "Football-plus.az"ın suallarını cavabladı.

- Oyun haqda fikirlərin necədi?
- Matça yaxşı başladıq. İlk hissədə üç qol vurduq, önəmli üstünlük əldə etdik. Təəssüf ki, 2-ci hissədə bu tempi davam etdirə bilmədik. Ümumi götürsək, yaxşı oyun keçdi. Bu stadionda "Neftçi"yə qarşı oynamaq həmişə maraqlıdı.

- Tempi davam etdirə bilməməyin səbəbi rəqibin müqaviməti oldu, yoxsa özünüz istəmədiz?
- Burda rəqibin rolu var. Rəqib hesabda geri olandan sonra daha çox irəli atıldı. Səbəbi bunda görürəm. İlk hissədəki tempi davam etdirməliydik. Nəticədən razıyıq və gələn oyuna hazırlaşacağıq.

- "Neftçi"yə heç yazığınız gəlmədi?
- Demək çətindi. Bu, mərkəzi qarşılaşmadı. Biz də onlar kimi hər oyunda qələbə qazanmaq istəyirik. Rəqibdən asılı olmayaraq, əlimizə düşən şansları dəyərləndirməyə, maksimum qol vurmağa çalışırıq.

- Cavab görüşü üçün motivasiyanı necə tapacaqsız?
- "Neftçi" ilə oynamaq həmişə maraqlıdı. Motivasiya baxımından heç bir çətinlik olmayacaq. Eyni tərzdə ikinci oyuna da hazırlaşacağıq.

- Finalda rəqibin "Qəbələ", yoxsa "Zirə" olmasının fərqi varmı?
- Elə bir fərqi yoxdu. Biz öz oyunumuza hazırlaşırıq. Hədəfimiz kuboku götürməkdi.

- Hesabın belə olacağını gözləyirdiz?
- Biz hər oyuna maksimum güclə hazırlaşırıq. Əlimizdən gələn qədər imkanları dəyərləndirməyə çalışırıq. Bəlkə də daha çox qol vura bilərdik.

- Komanda hazırda ideal vəziyyətdədi. Futbolçuların yarıdan çoxu da bəzi klubların maraq dairəsindədi. Yayda həmin oyunçular getsə, bizi necə "Qarabağ" gözləyir?
- Bu, "Qarabağ"da illərboyu davam edən prosesdi. Həmişə kimlərsə gedir və onların yerinə başqaları gəlir. Kimlərinsə getməsi böyük problem olmayacaq. Çünki burda önəmli olan sistemdi. Sistemə uyğun oyunçular tapılır və onlar da əvvəlki formalarından daha yaxşı çıxış edirlər. Önəmli olan sistemi qorumaqdı. Oyunçular dəyişir, amma sistem dəyişmir.

ƏSƏD SEYİDOV