"Komanda olaraq, çətin dönəmlərdən keçirik. Buna baxmayaraq, mənim üçün belə hədiyyə çox xoş oldu. Bir klubda 250 oyun keçirmək, məncə, böyük işdi. Sevinirəm ki, "Qəbələ" kimi komandada belə uğura imza atmışam. Elitanı tərk edəcəyimiz dəqiqləşəndən sonra 3 turun hər birində qələbə qazanmışıq. Öncədən də yaxşı oyun göstərirdik. Lakin bunu tamamlayıb, qələbə qazana bilmirdik. Komanda elitadan düşəndən sonra rahatlaşdıq sanki. Öncədən üzərimizdə daha çox yük və məsuliyyət var idi. Amma düşünürəm ki, həmin dönəmlərdə vəziyyətdən çıxmaq üçün bizə bir qələbə lazım idi. İstər "Neftçi", istərsə də "Səbail" ilə oyunda buna çox yaxın idik. Məncə, qırılma nöqtəsi "Səbail"ə 2:0 qalib gəldiyimiz halda 2:3 məğlub olmağımız oldu. O oyunda qazansaydıq, "Kəpəz"ə daha da yaxınlaşırdıq. Biləcəkdik ki, 5 xal fərqimiz var. Sonraki oyunlara məsuliyyətli yanaşacaqdıq. Həmin məğlubiyyətdən sonra ruh düşkünlüyü oldu. Amma əsas odu ki, komanda dağılmayıb. Hər kəs öz yerindədi. Birinci liqaya düşmək bizim üçün faciə deyil. Böyük klublarda da belə hal yaşanır. Əlimizdən gələni edəcəyik ki, növbəti mövsümdən etibarən yenidən əsas liqaya qayıdaq. Sonuncu turda "Sumqayıt"la vacib matçımız var. Onlar üçün Avropaya getmək baxımından əhəmiyyətli oyundu. Lakin biz də futbolçu olaraq, əlimizi yanımıza salıb çıxan deyilik. Meydana qələbə üçün çıxacağıq. Samir Abasov sonuncu mətbuat konfransında hər şeyin "Qəbələ"dən aslı olduğunu demişdi. Məncə, hər şey bizdən çox onlardan asılıdı. Kim güclüdüsə, o da qalib gələr. "Qəbələ" həmişə olduğu kimi, öz oyununu oynayacaq. Nə qədər ciddi hazırlaşsalar, o qədər yaxşı olacaq. İnşallah, mayın 25-də hər şey aydın olacaq".