"Yeni yaradılan komanda olmasına baxmayaraq, futbolçular əvvəlki mövsümlərdə digər klubların hetətində çıxış edib. Mövsümə erkən başlayaraq, komandanı bir yerə toparladıq. Lakin komandanı yığmaqda bir qədər problem yaşadıq. Çünki yeni yarandığı üçün başqa klublardakı oyunçularla danışıqlar aparıb, onları transfer etmək heç də asan olmadı. Qızlar Liqasında yaxşı oyun göstərərək çempion olmaq istəyirdik. Çünki əlimizdə olan heyət də buna imkan yaradırdı. Həqiqətən çox istedadlı futbolçulardı. Lap əvvəldən hədəfimiz çempionluq idi. Ona görə ki, "Sabah" akademiyasının çempionluq adət-ənənəsi var. Bəlkə də ölkədə ən çox çempion olan yaş qrupları "Sabah"dadı. Biz də bunu dərk edirdik ki, qızlar qrupu olaraq, çempionluğu kluba hədiyyə edək. Qızların oğlanlardan geri qalmasını istəmirdik. Şükür, bunu bacardıq. İlk ilimizdə göstərdik ki, qızlar da "Sabah"ın adət-ənənəsinə sadiq qalır. "Sabah"ın rəhbərliyi bizi dəvət edərək, belə fikir olduğunu bildirdi. Bizə də şərait yaradıldı. Qalib gələcəyimizə şübhəmiz yox idi. Çünki "Neftçi" ilə artıq 3-cü qarşılaşmamız idi. Başqa görüşlərin də hər birində qaləbə qazanmışdıq. Üstəlik rəqibin heyətində həm cəzalı, həm də zədəli futbolçular var idi. Buna görə bizə müqavimət göstərə bilmədilər. Bu da ilk çempionluğumuza səbəb oldu. Hesabın böyük olmasına baxmayaraq, oyunun əvvəli çətin oldu. Lakin ilk 10 dəqiqədən sonra üstünlüyü ələ keçirdik və hesab arasındakı fərqi açdıq. Ondan sonra qollar ard-arda gəlməyə başladı. Amma belə böyükhesablı qələbə gözləmirdik. Çünki final matçı idi. Bizim uşaqlarda həyəcan var idi. Rəqib daha ciddi yanaşırdı oyuna. İlk hissədə hesab 7:0 olduğundan, ikinci hissədə daha rahat oldu. Qələbəyə görə qızlara təşəkkürümü bildirirəm. İlk ilimiz olmasına baxmayaraq, həm maddi, həm də mənəvi cəhətdən hər şəraitlə təmin olunmuşuq. Klubun icraçı direktoru Ramil Həsənov və akademiyadan Namiq Süleymanov hər həftə oyunlarımız, məşqlərimiz, qısası, hər şey ilə şəxsən maraqlanırdılar. U-17 liqası olmasına baxmayaraq, cəmi iki oyunçumuz 16-17 yaşındadı. Qızlarımızın çoxu 15 yaşlılardı. Onlar üçün də "Sabah"da çıxış etmək, çempionluq yaşamaq böyük təcrübə oldu".