AFFA-nın Yüksək Qızlar Liqasında iştirak edən və mövsümə qələbə ilə başlayan “Araz-Naxçıvan”ın qızlardan ibarət komandası ilk matçda “Şəmkir”i məğlub edib.

"Football-plus.az" xəbər verir ki, uzun marafona qalibiyyətlə başlayan “qırmızı-ağlar”ın baş məşqçisi İradə Quliyeva bunu sürpriz hesab etməyib.

O, klub saytına açıqlamasında qələbənin sirrini bu cür izah edib:

“Heyətə cəlb etdiyim oyunçular futbola dünən başlamayıb. Onlar mütəmadi olaraq məşqlərdə iştirak edir, müxtəlif turnirlərə qatılırdı. Bu məqamda “Araz-Naxçıvan” rəhbərliyinə təşəkkür edirəm, bizə şərait yaratdı və dəstək oldu. Biz də klub adından ölkə çempionatına qatıldıq. Qızlar oyuna çox həvəslə çıxmışdı. Böyükhesablı qələbə qazanmağımızı da buna bağlamaq istərdim. Çünki “Şəmkir” heç də zəif komanda deyil. Yeni mövsümə qələbə ilə başlamaq növbəti oyunlara daha motivasiyalı hazırlaşmaq üçün stimul olacaq”.

Təcrübəli mütəxəssis planlarından bəhs edərkən iddialı olduğunu da gizlətməyib:

“Komandanın qarşısına konkret məqsəd qoyulmayıb. Amma baş məşqçi kimi, əlbəttə, hər zaman yüksək yerlər uğrunda mübarizə aparmağa çalışmışam. İşləri də bu istiqamətdə qurmuşuq. Bilirəm, asan olmayacaq. “Araz-Naxçıvan” olaraq çalışacağıq ki, mövsümü yüksək yerlərdən birində başa vuraq. Klub rəhbərliyi bizim üçün normal şərait yaradıb. Qızlar da iddialıdı. İstəyirlər ki, həm mükafatçılar sırasına düşək, həm də özlərini inkişaf etdirməklə gələcəkdə millinin üzvünə çevrilsinlər”.