İtaliya kalçosunun mövsümü bir qədər uzandı.

"Football-plus.az" xəbər verir ki, yalnız bir neçə gün əvvəl A seriyasının növbəti mövsümündə iştirak edəcək son iki komanda müəyyənləşdi. “Verona” elitada yerini qorumaq uğrunda neytral meydanda keçirdiyi oyunda “Spetsiya”ya 3:1 hesabıyla qalib gəlməklə bu komandanı aşağı diviziona göndərdi. Və bunu Salvatore Bokkettinin ilk ciddi məşqçi uğuru saymaq olar. “Rubin”in və “Spartak”ın sabiq müdafiəçisi mövsümün gedişində “sükan arxasına” keçəndə komanda B seriyasına doğru yol almışdı, ancaq son nəticədə İtaliya futbolunun elitasında yerini qoruya bildi.

Pley-offun əsas qəhrəmanı isə “Lester”in əfsanəvi çempionluğunun memarlarından biri Klaudio Ranyeri oldu. 71 yaşlı məşqçi “Kalyari”ni ötən ilin dekabrında qəbul etdi. Onda komanda B seriyasında 14-cü pillədə qərarlaşmışdı və yalnız aşağı diviziona yuvarlanmamaq haqda düşünürdü. Ranyeri isə nəinki sardiniyalıları bataqlıqdan çıxardı, onları həm də elitaya yüksəlmək uğrunda pley-off oyunlarına daşıya bildi. Burda isə bir-birinin ardınca “Venetsiya”nı, “Parma”nı və nəhayət, “Bari”ni “boğdu”.

“Bari” ilə cavab oyunu (ilk yarı 1:1 bitmişdi), ümumiyyətlə, dramatik axarda keçdi. 0:0 hesabı 94-cü dəqiqəyə qədər qorundu. Ancaq Ranyerinin 89-cu dəqiqədə meydana buraxdığı Leonardo Pavoletti qələbə topunu vurmağı bacardı. 71 yaşında da motivasiyasını itirməyən, peşəkarlıq, incəlik və intelligentlik nümunəsi kimi qalan mütəxəssisin önündə, sadəcə, təzim etmək lazımdı.

“Kalyari” ilə “Verona”ya qədər “Frozinone” və “Cenoa” da elitada oynamaq hüququ qazanmışdı, “Spetsiya” ilə birgə yüksək divizionu tərk edənlər isə “Kremoneze” ilə “Sampdoriya”dı. İtaliyada yeni futbol mövsümü avqustun 19-da start götürəcək. Ölkə kubokunun finalının tarixi hələ müəyyənləşməyib, Superkubok uğrunda oyunlar isə gələn ilin yanvarında, özü də yeni formatla keçiriləcək. İş ondadı ki, bu dəfə Superkubok uğrunda oyunda iki komanda üz-üzə gəlməyəcək. Mükafat uğrunda skudettonun son sahibi “Napoli”, A seriyasında 2-ci yeri tutan “Latsio”, ölkə kubokunun son qalibi “İnter” və bu turnirin finalçısı “Fiorentina” mübarizə aparacaq.

İtaliya təmsilçilərinin bu il avrokubokların üçünün də finalında uduzması, yığmanın gənclər arasında dünya çempionatının finalında Uruqvaydan aldığı məğlubiyyət fonunda belə, başa çatan futbol mövsümün yekunlarını A seriyası üçün müsbət dəyərləndirmək olar. Bəli, ötən əsrin 80-90-cı illərində A seriyası Avropanın klub turnirlərində dominant mövqeyindən çıxış edirdi. İtaliya klubları bir il üç finalın üçündə, daha üç dəfə üç finalın ikisində qalib gəlmişdilər. Həmin liqa Avropanın ən güclü turniri idi, bu üzdən komandaları müntəzəm finallarda görünürdü, favorit sayılır və tez-tez kubokları ələ keçirirdilər. İndiki A seriyası üçün finalların özündə iştirak belə yerli futbol təsərrüfatını bürüyən çoxsaylı problemlər, dünya səviyyəli ulduzların yoxluğu fonunda artıq böyük uğurdu. Bəli, “Roma”, “Fiorentina” və əlbəttə, “İnter” finaldakı məğlubiyyətə görə aşkar üzüntü içindədi, axı kubok onların biraddımlığındaydı. Ancaq mövsüm başlamamış kimsə İtaliya klublarının avrokubokların üçünün də finalında oynayacağını (Apenninin daha iki klubu yarımfinalda mübarizəni dayandırıb) proqnozlaşdırsaydı, başqaları həmin adama dəlixananın yolunu göstərərdilər.

Çempionlar Liqasının növbəti mövsümündə İtaliyanı “Napoli”, “Latsio” və Milan nəhəngləri – eyniadlı komanda ilə “İnter” təmsil edəcək. A seriyası Avropa Liqasına “Roma” ilə “Atalanta”nı göndərəcək. Konfrans Liqasında isə “Yuventus” çıxış edəcək. Yox, UEFA turinliləri cəzalandırsa, onların yerini “Fiorentina” tutacaq.

Kalçoda işlərin ümumi axarı fonunda A seriyası başa çatan mövsümü aktivinə yazmağa məcburdu. Amma avrokubokların yeni mövsümü İtaliya futbolunun sabiq, dayanıqlı tərəqqi yoluna qədəm qoyduğunu, yoxsa gördüyümüz mənzərənin hadisələrin xoş axarından irəli gəldiyini hər kəsə göstərəcək.

Yeri gəlmişkən...
"İnter" baş məşqçisi Simone İnzaginin müqaviləsinin müddətini uzadacaq. Bu haqda barədə məşhur insayder Nikolo Skira xəbər yayıb. Onun sözlərinə görə, 47 yaşlı mütəxəssisin yeni sözləşməsi 2025-ci ilin yayına qədər nəzərdə tutulacaq. Milan təmsilçisinin rəhbərliyi İnzaginin maaşını da artırmaq qərarına gəlib.

Qeyd edək ki, İnzagi 2021-ci ilin yayında "İnter"in baş məşqçisi təyin olunub. Onun komandası Çempionlar Liqasının finalında “Mançester Siti"yə 0:1 hesabıyla uduzub.