Bu gün Misli premyer-liqasında 35-ci tura start verilib.

Mayın 17-nə yalnız bir oyun salınıb. Həmin oyun da “CBC Sport” vasitəsilə canlı yayınlanıb.

17 may
4-cü dövrə, 35-ci tur
Qarabağ – Turan Tovuz 4:3
Olavio Juninyo, 19, Leandro Andrade, 69, 90, Mateus Silva, 75 - Emmanuel Hakmann, 47, 85, Luis Paçu, 53
“Qarabağ”ın bu rəqiblə ev oyunlarının balansı: 3:+3=0-0, 9:1.
2022/23 – 3:0, 3:1; 2023/24 – 3:0.
Cəzalı: Redorik Miller (Turan Tovuz).
“Futbol+”in proqnozu: 40-30-30.
Bakı. Tofiq Bəhramov adına Respublika stadionu. Saat 20.30.

Ardıcıl üç turda “Sabah”, “Qəbələ” və “Sumqayıt”a qalib gələ bilməyən “Qarabağ” azarkeşlərinin narahatığına səbəb olmuşdu. Ağdamlıların çempionluğu təmin etdiyinə görə oyunlara ciddi yanaşmadığını deyənlər də var idi, xüsusilə aparıcı futbolçuların performansındakı enişi hiss etdiyinə görə nigaran olanlar da. Lakin 33-34-cü turlarda qazanılan qələbələr “köhlən atlar”ın müəyyən qədər toparlandığını göstərdi. “Zirə” üzərində qələbə kubokun final matçı ərəfəsində baş məşq xarakteri daşıdı. Yeganə qolun penaltidən vurulmasına baxmayaraq, ağdamlılar istəkli oyunla diqqəti çəkdi. Hiss olunurdu ki, Qurban Qurbanov müəyyən metodları sınaqdan keçirir. İndi qələbənin davamını “Turan Tovuz”la oyunda sərgiləməyə çalışacaqlar. Hər halda, turnir hədəflərindən birinə çatan kollektiv “qızıl dubl”a “yox” deməz. Təbii ki, bunun üçün “bozqurd” kimi əzmkar və baxımlı oyun göstərən rəqib ideallardan biridi. Qonaqların durumu isə qənaətbəxşdi. Ona görə ki, ən yaxın izləyicisi “Səbail”i 3 xal qabaqlayan komanda mövsümü 6-cı pillədə bitirəcəyini, demək olar ki, dəqiqləşdirib. Çünki “dənizçilər”i bundan sonra “Neftçi” və “Zirə” kimi avrokublar eşqi ilə alışan komandalarla ciddi mübarizə gözləyir. Buna baxmayaraq, “bozqurd”un arxayınlaşmaması üçün səbəblər yetərincədi. Azarkeşləri qələbəylə sevindirmək vacibdisə, tarixdə ilk dəfə “Qarabağ”ın meydanından da əliboş dönməyə bilərlər. Görəsən, Ayxan Abbasov köhnə-yeni çempiondan səfərdə xal qoparmağın yolunu tapıbmı? Yoxsa “ənənə” davam edəcək?

Ümumiyyətlə, bu komandalar indiyə qədər 7 matçda üz-üzə gəlib. Ağdamlılar bunların altısında 3, birində 1 xala yiyələnib. Topların nisbətində “köhlən atlar” öndədi – 19:6.

1. Qarabağ 35 26 4 5 95-35 82
2. Sumqayıt 34 14 12 8 36-36 54
3. Neftçi 34 15 8 11 48-39 53
4. Zirə 34 14 10 10 31-22 52
5. Sabah 34 15 7 12 47-40 52
6. Turan Tovuz 35 12 9 14 52-53 45
7. Səbail 34 11 9 14 50-56 42
8. Kəpəz 34 9 8 17 39-65 35
9. Araz-Naxçıvan 34 9 8 17 29-46 35
10. Qəbələ 34 6 5 23 28-63 23
Bombardirlər: Olavio Juninyo (Qarabağ) - 19, Aleksandr Ramalinqom (Səbail) - 15.

KƏNAN BAHADIR