“Qəbələ”nin yerliləri İcraiyyə Komitəsinin qərarını gözləyir
Yalnız Asif Məmmədovla Ülvi İsgəndərov qalmağa razıdı.
Ötən mövsüm ölkə kubokunu qazanan və yayda ölkəmizi avrokuboklarda təmsil edən "Qəbələ"nin 32-ci turdakı "Kəpəz"lə oyundan sonra (0:1) elitadan gedəcəyi rəsmiləşdi. AFFA İcraiyyə Komitəsi qeyri-adi qərar verməsə, “qırmızı-qaralar” gələn mövsüm 1-ci liqada çıxış edəcək. Legionerlərlə bağlı məsələ aydındı. “Qəbələ” rəhbərliyi aşağı dəstədə əcnəbilərin xidmətindən yararlanmaq fikrində olmadığını açıqlayıb.
Görəsən, yerli oyunçular bu haqda nə düşünür? Qalıb-qalmayacaqları ilə bağlı rəhbərliyə müraciət ediblərmi?
Sorğunun cavablarını təqdim etməmiş onu da nəzərinizə çatdıraq ki, bizdə olan bilgiyə görə, Asif Məmmədov hadisələrin axarından asılı olmayaraq, “Qəbələ”də qalmaq fikrindədi.
İlkin Qırtımov:
"Hələ qarşıda üç oyunumuz var. İnşallah, oyunlar bitəndən sonra fikirləşib bir qərar verəcəm. Lakin hazırda dəqiq heç nə deyə bilmərəm".
Emil Səfərov:
"Qəbələ” mənim üçün böyük məktəbdi. Futbolçu kimi bu klubda yetişmişəm. Lakin hələ ki danışığımız olmayıb. Düşüncəm belədi ki, xeyirlisi nədirsə, o da olar".
Ülvi İsgəndərov:
"Klubla hələ ki heç bir danışıqlar olmayıb. AFFA-nın qərarını gözləyirik. Mənim daha bir il müqaviləm var. "Qəbələ" ikinci ailəmdi. Mənə ehtiyac olarsa, 1-ci liqada da oynayaram".
Nicat Əliyev:
"Hələlik o barədə danışıq olmayıb. İcraiyyə Komitəsinin iclasından sonra elitada qalacağımız, yoxsa düşəcəyimiz rəsmən bilinəcək. Ən əsası bu mövsüm qurtarandan sonra iki il də klubla müvaqiləm var. Komanda 1-ci liqaya düşərsə və elitadan təklif olmazsa, məcbur qalmalı olacam. Hələ ki təklifim yoxdu. Mövsüm bitəndən sonra necə olacaq - onu gözləyirəm".
Rəşad Əzizli:
"Müqaviləmin müddəti bu mövsüm bitir artıq. Hər şey İcraiyyə Komitəsinin verəcəyi qərardan aslıdı. Klubun taleyi dəqiqləşsin, elitada qalıb-qalmayacağımızı biləndən sonra variantları seçəcəyik".
Urfan Abbasov:
"İndidən dəqiq nəsə demək mümkün deyil. Çünki rəhbərliklə bu haqda söhbətimiz olmayıb".
GÜNAY SÜLEYMANOVA
Digər xəbərlər
