Bu gün Misli premyer-liqasında 24-cü tura start verilib.

"Football-plus.az" xəbər verir ki, üç gün ərzində keçiriləcək oyunlar “CBC Sport” vasitəsilə canlı yayınlanacaq.

Misli premyer-liqası
3-cü dövrə, 24-cü tur
23 fevral
Kəpəz – Qəbələ 2:1
Georgi Papunaşvili, 19, Amil Yunanov, 66-pen. - Osama Xalayla, 44
“Kəpəz”in bu rəqiblə ev oyunlarının balansı: 13:+4=4-5, 13:17.
2010/11 – 0:0, 0:0; 2011/12 – 3:2; 2012/13 – 1:0; 2015/16 – 3:0, 0:1; 2016/17 – 1:1, 2:0; 2017/18 – 1:6, 0:1; 2022/23 – 0:3, 2:2; 2023/24 – 0:1.
Cəzalı: yoxdu.
“Futbol+”in proqnozu: 30-30-40.
Qəbələ, şəhər stadionu. Saat 17.00.

Məhz bu matç xüsusi prinsipiallığıyla seçiləcək. Bizi belə düşünməyə vadar edən bir neçə səbəb var. Birincisi, “Qəbələ” öz meydanında nominal qonaq statusunda oynayacaq. Gəncəlilər 9-cu, qəbələlilər 10-cu sıradadı və arada 5 xal fərqi var. Yəni yekun nəticədə fərqin azalmasını istəyənlərlə artmasını istəyənlərin mübarizəsinə şahidlik edəcəyik. Diqqətçəkən məqamlardan biri də “Kəpəz” son 5 ev oyununda “Qəbələ”ni məğlub edə bilməməsidi.
Qeyd edək ki, komandalar cari mövsümdə iki dəfə üz-üzə gəlib. Hərəyə 1 qələbə qazanılıb. Maraqlıdı ki, sonuncu matçda – 16-cı turda “Kəpəz” “Qəbələ”ni darmadağın edib – 3:0. İndi “qırmızı-qaralar” həmin günün intiqamını almaqla əsas rəqibini büdrətməlidi. Gəncə təmsilçisi son iki turda məğlub olub. Qısası, enişdə olduqlarına şübhə yoxdu. Elmar Baxşıyevin yetirmələri isə ötən turda məlum səbəbdən meydana çıxmadı. Bu amilin kollektivə yaxşı və ya pis təsir edəcəyi bəlli deyil. “Qəbələ” sonuncu qələbəsini 18-ci turda “Sabah” üzərində qazanıb – 1:0. Yəni “qırmızı-qaralar” 2024-cü ildə 3 xal əldə edə bilməyib. Bu oyunda xoşagəlməz seriyanın qırılıb-qırılmayacağı da maraqlıdı. Vurğulamaq da fayda var ki, “sarı-göylər” bu matçda “sülh”lə kifayətlənsə belə, qazanclı olacaq. Nominal qonaqların isə qələbədən başqa yolu yoxdu!

Ümumiyyətlə, komandalar indiyə qədər 26 dəfə qarşılaşıb. Bunların 7-də “Kəpəz”, 11-də “Qəbələ” qələbə qazanıb, 8-də isə qalib müəyyənləşməyib. Topların nisbətində “qırmızı-qaralar” öndədi – 33:24.

KƏNAN BAHADIR