“Sumqayıt”ın səfərdə “Turan Tovuz”un qapısına 4 qol vurması şəxsən mənim üçün xeyli gözlənilməz oldu.

Zaman-zaman “Sumqayıt”ı da, onun baş məşqçisi Samir Abasovu da ifrat müdafiəyə həvəs göstərməsinə görə tənqid etmişik. Elə sonuncu yazılarımdan biri də bu haqda idi. “Sumqayıt”ın “Turan Tovuz”a qarşı keçirdiyi oyunlar da o qədər də baxımlı alınmırdı. Heç də təsadüfi deyil ki, bu rəqiblər mövsüm ərzində keçirdikləri əvvəlki üç görüşdə qalibi müəyyənləşdirə bilməmiş, meydandan bərabərliklə ayrılmışdı. Məhz bu statistikanı nəzərə alanda budəfəki görüşün də əvvəlkilərə oxşayacağını proqnozlaşdırmaq mümkün idi. Amma ehtimallar doğrulmadı.

İndi iddia edə bilmərik ki, Samir Abasov məhz tənqidlərdən yorulduğu üçün riskə getdi, səfərdə “Turan Tovuz”a qarşı “açıq futbol” oynadı. Çünki Abasov özü də bu yaxınlarda mətbuat konfransında demişdi ki, onun üçün mətbuatın nə yazması, azarkeşlərin və mütəxəssislərin nə deməsi maraqlı deyil. Yumşaq desək, belə şeyləri vecinə də almır. Bəs onda nə baş verdi? “Sumqayıt” o cəsarəti hardan tapdı ki, ötən ilin avqustunda, premyer-liqanın açılış turunda etdiyi qəhrəmanlığı təkrarlayıb, 90 dəqiqə ərzində 4 qol vurmağı bacardı? Məncə, burda bir neçə amil həlledici rol oynadı. Sırasıyla və qısaca bunlara toxunmağa çalışacam.

Heç kimə sirr deyil ki, Abasov bəzi rəqiblərə qarşı konkret motivasiya ilə hazırlaşır, futbolçularını da məhz həmin komandalarla oyunlara aqressiv kökləyir. “Neftçi” ilə “Turan Tovuz” bu siyahıda ilk üç yeri tutan komandalardan ikisidi. “Neftçi”ylə haqq-hesabın səbəbi bəllidi. “Turan Tovuz”da isə Ayxan Abbasov amili var. “Sumqayıt”ın sabiq baş məşqçisi Riad Rəfiyevlə yaxşı vidalaşmayıb. Bu iki şəxsin münasibəti yetərincə sərindi. Deməli, Samir Abasov da həm Ayxan Abbasovdan daha yaxşı məşqçi olduğunu isbatlamağa çalışır, həm də öz “şefinə” jest edir. Heç şübhə etmirəm ki, Ayxan Abbasova qarşı xüsusi hazırlığın əsas səbəbləri bunlardı. 3 xal qazanmaq yaxşıdı, amma Samir Abasov qələbə qazanmaqdan ötrü bütün riskləri gözə alan mütəxəssis deyil. Belə olsaydı, misal üçün, “Zirə”yə qarşı da “Sumqayıt” bu cür oynayardı.

Tovuzdakı böyükhesablı qələbəni təkcə Samir Abasovun yüksək motivasiyası ilə əlaqələndirməzdim. Bəli, “Sumqayıt” səfərdə yaxşı oynadı, hücumçular şanslardan maksimum yararlandı, müdafiəçilər diqqətli davrandı. Amma bu işdə qonaqlara elə meydan sahibləri də kömək etdi. Kapitan Şəhriyar Əliyev həlledici məqamda qapıların yerini səhv salmaqla “Sumqayıt”ın xeyrinə qol vurdu. Əvəzində “Turan Tovuz”un qol ümidi Otto Con əlinə düşən imkanları sağa-sola xərclədi, topu Mehdi Cənnətovun qoruduğu qapıdan başqa bütün istiqamətlərə ünvanladı. Mən hələ start heyətini qurarkən səhvə yol verən Ayxan Abbasovun “zəhmətini” demirəm. Təsəvvür edirsizmi, 25-ci dəqiqədə iki futbolçunu birdən əvəzləmək nə deməkdi? Bu o deməkdi ki, Ayxan bəy mövsümün ən vacib qarşılaşmalarından birinə hazırlaşarkən səhvə yol verib, start heyətini düzgün qurmayıb. Gərgin oyunun tempinə cəmi 25 dəqiqə tab gətirə bilən Luis Paçu kimi legionerlərə güvənən Abbasovun planları baş tutmadı. Elə bütün bunların nəticəsidi ki, tovuzlu azarkeşlər 1:4 hesablı məğlubiyyətə üzüldülər.

Görünən odu ki, Ayxan Abbasov çətin sınaqdan üzüağ çıxa bilmədi. Bu qarşılaşmanın əhəmiyyəti ona görə böyük idi ki, “Sumqayıt”la görüş ərəfəsində “Turan Tovuz”un avrokuboklara yollanmaq şansı yaranmışdı. Hətta klubun rəhbəri, çox hörmətli Ehtiram Quliyev avrokuboklara vəsiqə qazanacaqları halda Tovuzda oynamaq istəklərini də dilə gətirmişdi. Bu məqsədlə UEFA nümayəndələri Tovuza səfər etmiş, stadionun vəziyyəti ilə tanış olub, qeydlərini aparmışdılar. Belə bir məqamda doğma meydanda 1:4 hesabıyla uduzmaq heç yerinə düşmədi. Sanki Avropaya yollanmağa tələsən “Turan Tovuz” bu arzuyla alışdı, özünü yandırdı. Avrokuboklar çox ciddi sınaqdı, ora yollanmağı təkcə arzulamaq bəs etmir. Bunun üçün hazırlaşmaq, həm yaxşı baş məşqçiyə, həm səviyyəli legionerlərə, həm də meydanda can qoyan, çətin məqamda üzərinə məsuliyyət götürməyi bacaran yerli futbolçulara sahib olmaq lazımdı. Avropa gedən yol çox uzundu, cənablar. Bu qədər tələsməyin!

AMAL