Aprelin 9-da Gəncə şəhər stadionunun təməli qoyuldu.
"Football-plus.az" bildirir ki, idman qurğusu 15 min 464 yerlikdi. Bu tutum birmənalı qarşılanmayıb. Belə ki, bəziləri stadionun tutumunun Gəncə üçün az olacağını düşünür. Hərçənd Sumqayıtın acı təcrübəsi də ortadadı. Bəs yeni stadion şəhərin tələbatını nə dərəcədə ödəyəcək? Bu sualını “Kəpəz”in sabiq rəsmisi Nofəl Əzizova ünvanladıq:
“Allah xeyir versin. Gəncə stadionun tikilməsi çox yaxşı haldı. Buna görə gəncəlilər, futbol azarkeşləri adından cənab Prezidentə təşəkkürümü bildirirəm. Bu addımla bizə gözəl bir hədiyyə etdi. Gəncədə futbolsevərlər həmişə çox olub, olacaq da. Əvvəlki böyüklükdə stadionun tikilməməsinin problemi yoxdu. Yarıboş tribunalar olunca belə tutum yaxşıdı. O vaxtki kimi quru sementin üstündə dayanınca, 15 minlik yerdə rahat oturub azarkeşlik etmək ən yaxşısıdı. Gəncəyə 10-12 minlik stadion bəs edir. Yəni əvvəllər də təxminən o qədər tamaşaçı olurdu”.
Əzizov stadionda əvvəlki vaxtlardaki kimi azarkeş rekordlarının yenilənəcəyinə şübhə etmədiyini, bunun üçün isə “Kəpəz”in həminki vaxtlara qayıtmasına ehtiyac olduğunu qeyd etdi:
“Düzdü, tibunaların tam dolub-dolmayacağını Gəncə stadionu hazır olandan sonra bilmək olar. Görək əvvəlki azarkeş qalıbmı? Elə gözəl stadiona elə gözəl komanda lazımdı. Azarkeşləri komandadan ayrı salan anlaşmazlıqdı. Gərək əvvəlki izdihamın yaşanması üçün gözəl klub da olsun. Azarkeş gözəl komanda, yaxşı oyun istəyir. Onu vermək lazımdı. İnanıram ki, gələcəkdə Adil Şükürov bunu bizlər üçün yaradacaq. Ona inanıram. Ümid edirəm ki, Gəncə azarkeşləri də stadionu tam dolduracaq. Yəqin ki, problemlər həll olunar. Gəncə öz köhnə vaxtlarına qayıtmalıdı”.
RÖYANƏ OĞUZ