“Üç oyunda top buraxmadıq, 4-cü oyundan sonra əməkhaqqı problemi başladı” – “İrəvan”ın mətbuat katibindən şok açıqlamalar
1-ci liqanın ən qalmaqallı klublarından sayılan “İrəvan”ın başı yenə dərddədi.
Belə ki, Rusiyadan dəvət olunan qapıçılar üzrə məşqçi Aleksandr Jidkov müqavilə şərtlərinə əməl etməyən klubdan FİFA-ya şikayətlənib. Rusiyalı çalışdırıcının addımına münasibət öyrənmək üçün “İrəvan”ın mətbuat xidmətinin rəhbəri Mübariz Zeynallıya müraciət etdik. Onun “Football-plus.az”a açıqlaması:
“Jidkov haqqını tələb edir. Onu Rusiyadan klub prezidenti Zahid Niyazəliyev dəvət etmiş və müqavilə imzalamışdı. Sonra razılaşmaya əməl olunmadı, Jidkov da şikayət ünvanladı. Məncə, kim olsa, eyni şeyi edərdi. Əlbəttə, klub rəhbərliyi razılaşmaya əməl etməməklə ciddi səhvə yol verdi. Jidkov Rusiya vətəndaşı olmasına baxmayaraq, Nazim Süleymanov, Samir Ələkbərov kimi Azərbaycan futbolunun əfsanəsidi. Bunlar “Neftçi”nin yetirmələridi və Azərbaycan futbolunun inkişafından ötrü öz fikirlərini söyləyənlərdi. FİFA-ya şikayət etmək Jidkovun haqlı iradıdı, hüququdu. Bunu yalanlaya bilmərik. Ən azı günahdı”.
- Dediyiniz şəxslər Azərbaycan futbolunun əfsanəsi olsalar da, məşqçi kimi bunu görmədik.
- Doğrudu, biz, yəni “İrəvan” klubu onlara qiymət verə bilmədi.
- Klub deyəndə rəhbərliyi nəzərdə tutursuz?
- Aydın məsələdi. Klub kim tərəfindən idarə olunur ki?! Yəni rəhbərlik onları dəyərləndirə bilmədi.
- Bəs nə üçün dəyərləndirilmədikləri klubdan istefa vermirlər?
- Bildiyiniz kimi, Aleksandr Jidkovdan fərqli Nazim Süleymanovla Samir Ələkbərov Azərbaycan vətəndaşıdı. Sözsüz, Jidkov ölkəsinə qayıtmalıydı. Nazim və Samir müəllimlər isə müqaviləsi olduğuna görə hələ gözləyirlər. Həm də onlar Azərbaycan vətəndaşıdı. Hörməti, ehtiramı tapdalamaqda olmur axı. Ümumiyyətlə, heç bir məşqi, heç bir məşqçi köməkçisi istəməz ki, klub bu vəziyyətə düşsün. Mövsümün əvvəlində üç oyunda top buraxmadıq, 4-cü oyundan sonra artıq əməkhaqqı problemi başladı. Bu isə öz növbəsində Jidkova da, Nazim müəllimə də, Samir Ələkbərova da, hətta mənə də təsir etdi. Bir sözlə, klubun bütün idarə heyətinə təsir etdi. Bu acınacaqlı hal yaşanmamalıydı.
- İşlərin bu yerə gəlməsinə nə ad vermək olar?
- Səriştəsizlikdi, təcrübəsizlikdi. Mən peşəkar jurnalistəm. Bu kluba dəvəti də böyük ruh yüksəkliyi ilə qarşılamışdım. “İrəvan” adı bir dünya brendi kimi səslənməliydi. Biz də bunun üçün çalışırdıq. Həmin günləri xatırlayıram, elə bilirdim ki, o klubla sanki İrəvanı almışıq. Təəssüf ki, istədiklərimiz alınmadı.
KAMAL SƏFƏR
