“Turnirdən öncə Nicat üçün çətin olacağı gözlənilən idi. Ən azından reytinq məsələsinə görə çempionluq şansı o qədər də görünmürdü. Həm də son yarışlardakı nəticələrinə baxanda bilinir ki, formada deyildi. Oyunları pis alınmasa da, yekunda nəticələri yaxşı olmurdu. Sonuncu dəfə uğurlu çıxış etdiyi turnir avqustda Bakıda keçiriləm Dünya Kuboku olub. Ondan sonra bir sıra turnirlərdə iştirak etmişdi, amma istənilən nəticələr qeydə alınmamışdı. Düşünürəm ki, Nicatın ardıcıl olaraq son 2 oyundakı məğlubiyyətinin səbəbi yorğunluqdu. Çünki, oyunun sonlarında şahmatçımız səhvə yol verir. Məsələn, Dommaracu Qukeşlə oyunda, rəqib şahmatçı da müxtəlif səhvlərə yol vermişdi. Ancaq şahmatçımızın oyun tərzindən bilirik ki, o, çox səhv edən bir qrossmeyster deyil. Oyun zamanı 1-2 dəfə qeyri-dəqiq gedişlər edər və rəqibin səhvindən də tez bir zaman da yararlana bilər. Məğlubiyyətlərinin səbəbini tam dəqiqliklə bilmirəm. Ola bilsin ki, fiziki yorğunluq var və ya endşpildə (şahmatda oyun sonluğuna verilən ad - red.) gediş ardıcıllığı pozulur. Buna təcrübəsizlik deməzdim, amma Rameş Praqnandha ilə oyunda da məğlubiyyətinin əsas səbəbi o idi ki, endşpildə çox kobud səhvlərə yol verdi. Hansı ki, fiqurları aktivləşdirib, bərabər vəziyyət əldə etmək olardı. Təbii ki, Qukeşə məğlub olduqdan sonra Praqnanadha ilə qara fiqurlarla oynayacaqdı və çətin olacağı gözlənilirdi. Həm psixoloji cəhətdən də şahmatçımız oyun zamanı bir qədər gərgin görünürdü. Bu gün Vidit Santoşa qarşı ağ fiqurlarla mübarizə aparacaq. Ən azından məğlub olmamağını gözləyəcəyik. Çünki, 2 oyun ardıcıl məğlub olub və bu, Nicatın üzərində psixoloji təzyiq yaradır. İnşallah ki, qələbə gözləyirik. İndi daha maraqlı və fərqli debütlər (şahmatda oyunun başlanğıcına verilən ad - red.) olacaq. Yəqin ki, şahmatçımız qələbəyə oynayacaq. Qara fiqurlarla 3 oyun oynayıb və hər birində məğlub olub. Bəlkə də debüt seçimləri o qədər də uğurlu alınmayıb, amma debütlərdə də vəziyyəti yaxşı alınmır. Hətta deyərdim ki, qara fiqurlarla debütdən daha yaxşı çıxır, nəinki ağlarla. Yəni, ağ fiqurlarla o qədər də aktiv debütlər görmürük. Ümid edək ki, bugünkü oyunda daha aktiv oynayacaq, ona növbəti oyunlarda da uğurlar arzulayıram”.